Përfaqësuesja e Lartë e Bashkimit Evropian, Federica Mogherini, ka përshëndetur vendosmërinë e anëtarëve të Presidencës trepalëshe të Bosnjës për të punuar së bashku, duke theksuar se ky angazhim i tyre do të jetë në të mirë të Bosnje Hercegovinës dhe qytetarëve të saj, thuhet në një deklaratë nga zyra e Mogherinit.
Shefja e diplomacisë evropiane priti në takim anëtarët e Presidencës trepalëshe të Bosnjës, Millorad Dodik, Zheljko Komshiq dhe Sefik Xhaferoviq.
Sipas deklaratës, roli i Presidencës në “uljen e tensioneve politike dhe promovimin e pajtimit do të jetë vendimtar.”
Mogerini shprehu angazhimin e saj ndaj perspektivës evropiane të Bosnjës dhe theksoi se dëshiron të shohë përparimin e pakthyeshëm të Bosnjës dhe të Ballkanit Perëndimor drejt BE-së deri në fund të vitit.
Ky është takimi i parë jashtë vendit i anëtarëve të Presidencës trepalëshe të Bosnjës që nga inagurimi I tyre në nëntor të vitit të kaluar.
