Një gjykatë në Rusi ka dënuar një burrë me 28 ditë burg, vetëm pse ai krijoi një varr për presidentin Vladimir Putin.
Aktivisti Karim Yamadej u dënua të martën, në qytetin e Naberezhnye Chelny, pasi ishte hera e dytë që shkelte ligjin për organizimin e ngjarjeve të tilla publike.
Yamadej tha se po protestonte kundër një projektligji mbi “sovranitetin e internetit në Rusi”, sipas të cilit kërcënon lirinë e fjalës.
“BBC” shkruan se Rusia ka miratuar dy projektligje të mërkurën, që ndëshkojnë mosrespektimin e autoriteteve dhe shpërndarjen e lajmeve të rreme.
Projektligji i parë i referohet “mosrespektimit të hapur” ndaj shtetit, zyrtarëve dhe shoqërisë ruse, dhe shkelësit përsëritës të ligjit përballen deri në 15 ditë burgim.
I dyti ndalon shpërndarjen e “informacioneve të rreme që lidhen me interesin publik”.
Gazetarët, aktivistët për të drejtat e njeriut dhe madje edhe disa ministra të qeverisë ruse kanë shprehur kundërshtimin e tyre, ndërsa disa flasin për një “Perde të Hekurt” në internet që po ngrihet nga Rusia.
Nën Presidentin Putin, shteti rus ka marrë kontrollin e kanaleve kryesore televizive dhe mediave të tjera kryesore, kështu që zërat e opozitës janë kryesisht të kufizuara në mediat sociale.
Karim Yamadej ngriti më 10 mars një tip varri, pranë ndërtesës që strehonte komitetin hetimor të qytetit.
Në gurin e varrit të krijuar ishte vendosur fotografia e Putinit dhe vitet e jetës, 1952-2019.
Kreu i opozitës Aleksej Navalny e ka konsideruar krim arrestimin e aktivistit.
