Një i ri në Tiranë ka rënë nën prangat e policisë, pas akuzave për trafikim të lëndëve narkotike. 23-vjeçari me inicialet G.X dyshohet se shpërndante me porosi kokainë nëpër klube të ndryshme të kryeqytetit.
Pas një kontrolli, policia gjeti në makinën e të riut tre doza kokainë ndërsa në banesë rreth 19 doza të tilla.
“Goditet një tjetër rast i shpërndarjes së drogave të forta në formë dozash.
Në pranga një 23-vjeçar.
Sekuestrohen 19 doza me lëndë të dyshuar narkotike e llojit kokainë, peshore elektronike, automjet e aparate celular.
Seksioni për Hetimin e Narkotikëve arrestoi në flagrancë shtetasin:
- X., 23 vjeç, banues në Tiranë.
Shtetasi i lartpërmendur ishte në vëzhgim dhe në ndjekje nga shërbimet e Policisë, pasi për të disponohej informacion se në bazë porosie shpërndante në klubet e ndryshme të kryeqytetit lëndë narkotike të llojit kokainë në formë dozash.
Shërbimet e Policisë e kanë konstatuar këtë shtetas duke qarkulluar me mjet në aksin rrugor “Elbasan-Tiranë” dhe e kanë ndaluar për kontroll. Nga kontrolli i ushtruar në mjet, iu gjetën tre doza me lëndë të dyshuar narkotike e llojit kokainë.
Gjithashtu është ushtruar kontroll dhe në banesën e këtij shtetasi, ku në pjesën e kompjuterit iu gjetën të fshehura gjashtëmbëdhjetë doza me lëndë të dyshuar narkotike e llojit kokainë.
Në përfundim të veprimeve janë sekuestruar në cilësinë e provës materiale: 19 doza me lëndë të dyshuar narkotike e llojit kokainë; peshore elektronike; dy aparate celular; dhe nje mjet.
Materialet i kaluan për veprime të mëtejshme Prokurorisë së Rrethit Gjyqësor Tiranë.”, thuhet në njoftimin e policisë.
