Reagon më në fund Edi Rama pas dorëheqjes së Ramush Haradinajt për shkak të thirrjes së tij në Gjykatën e Hagës.
“Këto ftesa në radhë nga Haga për protagonistët e UÇK, janë një sfidë e re e çdonjërit prej të thirrurve, në vazhdën 20-vjeçare të betejës së pasluftës, për të provuar deri në fund pafajësinë e tyre. Por janë edhe një sfidë e papërfunduar kombëtare në anën e duhur të historisë”, shkruan në “Twitter” kryeministri i Shqipërisë.
Kështu me vetëm dy fjali dhe pas shumë e shumë orësh vonesë, Rama e quan “sfidë të re” atë të Haradinajt.
Ajo që bie në sy është se Rama nuk ka shkruar veçmas për Haradinajn, por për të dy, edhe për Jakup Krasniqin, i cili po kështu u kërkua në Hagë, kur thotë “Protagonistët e UÇK-së”.
Ramush Haradinaj dha dorëheqjen ditën e djeshme nga posti i kryeministrit me arsyetimin se është thirrur nga Gjykata e Hagës për të dëshmuar sërish lidhur me aktivitetin gjatë Luftës së Kosovës.
Por ajo që bën përshtypje, pas reagimit të thuajse gjithë politikanëve të rëndësishëm në Shqipëri, është heshtja e kryeministrit Edi Rama.
Asnjë postim për t’u solidarizuar me homologun e tij shqiptar në këtë ditë të vështirë për të.
Dorëheqja për shkak të Gjykatës së Hagës nuk është e para për Haradinajn pasi edhe herën e parë kur u zgjodh si kryeministër i Kosovës në 2004 ai qëndroi vetëm 100 ditë në zyrën e qeverisë dhe u thirr në 2005 nga Tribunali Ndërkomëbtar Penal për ish-Jugosllavinë.
Haradinaj ka pasur disa beteja me Gjykatën e Hagës dhe e para daton në vitin 2005 çka e detyroi të dorëhiqet edhe nga posti i Kryeministrit ashtu si edhe tani. Në 2005 pasi Haradinaj la postin e kryeminsitrit ai u paraqit vullnetarisht në Hagë u mbajt disa muaj në paraburgim dhe më pas u lirua përkohësisht deri në gjykimin e tij ku u lirua nga akuzat në 3 prill 2008 për mungesë provash bindëse.
