Ministrja e Mbrojtjes Olta Xhaçka nëpërmjet një deklarate publike ka bërë bilancin e përmbytjeve pas shirave të dendur që prekën vendin.
Xhaçka u shpreh se aktualisht janë në ujë rreth 105 banesa në Tiranë, ndërsa ka pasur probleme edhe në Fushë Krujë dhe Kamzë.
Ministrja u shpreh se institucionet testuan sistemin e ri të Mbrojtes Civile në situata problematike.
“Testuam Mbrojtjen Civile. Përmbytjet kanë sjellë fluks të madh uji. Institucionet kanë koordinuar punët për të përmirësuar situatën. OSHEE ka punuar gjatë gjithë natës, për të rregulluar disa shtylla. Banorët që janë prekur, institucionet iu janë gjendur pranë. Në qarkun e Tiranës, 105 banesa janë përmbytur. Edhe bluzat e bardha kanë bërë punë të mirë.
Situata pritet të normalizohet. Probleme kishte në Kamzë. Edhe në Fushë Krujë kemi pasur probleme, për shkak se në këtë zonë, disa zona administrative ka vërshime më të larta. Aktualisht ka 10 familje në Larushë dhe 8 familje në Bubq ka probleme. Lumi Ishëm ka dalë nga shtrati dhe ka rrezikuar banesat e ndërtuara pranë lumit. Në Lezhë, situata është normalizuar pasi kishte përmbytje në lagjen besëlidhje. Probleme ka pasur edhe në Laç. Në qarkun Shkodër, pavarësisht reshjeve të dendura, në 5 bashkitë nuk ka probleme. Problemet janë të kufizuara. Situata është thuajse e tejkaluar, por ne do jemi pranë gjithnjë të qytetarëve”-deklaroi Xhaçka.
