Qasja tejet emocionale e Greta Thunberg ndaj ndryshimeve klimatike, kërcënon debatin në një tjetër nivel mbi këtë temë, kanë paralajmëruar ligjvënësit gjermanë.
Në një fjalim provokues në Samitin për Aksionet Klimatike UNGA të hënën, 16-vjeçarja suedeze, Greta Thunberg, akuzoi liderët botërorë për vjedhjen e “ëndrrave” dhe “fëmijërisë” e saj duke mos bërë sa duhet për të luftuar ndryshimin e klimës.
“Ne jemi në fillimin e një zhdukjeje masive dhe gjithçka për të cilën mund të flisni është paraja dhe përrallat e rritjes së përjetshme ekonomike. Si guxoni! ” – predikoi ajo.
Aktivistja suedeze kapi titujt e parë të mediave ndërsa ngriti një padi zyrtare në Kombet e Bashkuara kundër Gjermanisë, Francës, Brazilit, Argjentinës dhe Turqisë që sipas saj kanë dështuar për të bërë sa duhet për të mbrojtur mjedisin për brezat e ardhshëm.
Ndërsa performanca e saj në OKB mori vlerësime nga partitë e krahut të majtë të Gjermanisë, ligjvënësit konservatorë ngritën alarmin për qasjen provokuese të Thunbergut.
Deputeti Roderich Kiesewetter, anëtar i Unionit Kristian Demokratik (CDU), tha se Thunberg po përpiqej të bullizonte ata që kërkojnë dialog të respektueshëm, të bazuar në fakte për çështjet e mjedisit.
“Kushdo që dëshiron të argumentojë në mënyrë racionale, tashmë është diskredituar që nga fillimi,” shkroi ai, duke shtuar se objektiviteti po flakej tej.
Një tjetër deputete e CDU-së, Jana Schimke, akuzoi Thunberg për përhapjen e “histerisë masive”.
Gerd Müller, ministri i Bashkëpunimit dhe Zhvillimit Ekonomik, theksoi në përgjigje të fjalëve “luftarake” të aktivistes se “mbrojtja e klimës nuk fillon me Greta Thunberg.”
