Ekstradohet nga Holanda një 33-vjeçar i dënuar me 30 vjet burg. Bëhet fjalë për shtetasin Fatmir Pjetri i lindur në Pukë. Pjetri dyshohet se ka qenë pjesë e një grupi kriminal (Babagjyshët) të cilët kanë kryer një seri vjedhjesh në 2013-ën qytetet e Tiranës, Laçit, Fushë-Krujës, Kuçovës dhe Durrësit.
Vitin e kaluar, Petri është dënuar me 30 vjet burg nga Gjykata e Krimeve të Rënda nën akuzat për vjedhje dhe grup të strukturuar kriminal.
DETAJET E POLICISË
Ekstradohet nga Hollanda 33 vjeçari i dënuar me 30 vjet burg, pjestar i një grupi të strukturuar kriminal në fushën e vjedhjes me armë.
Nga Specialistët e Interpol Tirana u krye ekstradimi nga Amsterdami/Hollandë drejt vendit tonë i shtetasit shqiptar Fatmir Pjetri 33 vjeç, lindur në Pukë.
Ky shtetas ishte shpallur në kërkim ndërkombëtar pasi:
Gjykata e Shkallës së Parë për Krimet e Rënda Tiranë me vendimin penal të vitit 2018, e ka dënuar me 30 vjet burg për veprat penale “Vjedhja me armë e kryer në bashkëpunim”, “Grupi i strukturuar kriminal” dhe “Kryerja e veprave penale nga organizata kriminale dhe “Grupi i strukturuar kriminal”.
Përmbledhje e ngjarjeve të ndodhura:
Shtetasi Fatmir Pjetri ka qenë pjesë e një grupi kriminal (Babagjyshët) që gjatë periudhës Janar-Dhjetor të vitit 2013 dhe në vazhdim, në qytetet e Tiranës, Laçit, Fushë-Krujës, Kuçovës dhe Durrësit kanë grabitur me armë disa argjendari në këto qytete.
Disa nga episodet:
- Në datë 28.09.2013 është vjedhur me armë argjendaria e shtetasit A. B., në Kuçovë;
- Në datë 05.11.2013 është vjedhur me armë argjendaria e shtetasit S. R., në Laç;
- Në datë 25.11.2013 është vjedhur me armë argjendaria e shtetasit P. B., në Fushë-Krujë;
- Në datë 24.12.2013 është vjedhur me armë argjendaria në një qendër tregtare në Tiranë.
Si rezultat i bashkëpunimit të Interpol Tiranës me Interpol The Hague, u bë i mundur arrestimi i tij në Hollandë, duke u finalizuar me ekstradimin drejt vendit tonë.
