Zyra qendrore e OSBE-së ka nisur një proces të brendshëm hetimi mbi incidentin që ndodhi pak ditë më parë në Tiranë, ku ambasadori Berndt Borchardt u nxori gishtin e mesit protestuesve të Unazës së Re.
Përmes postës elektronike, zyra e OSBE-së ka informuar një prej banorëve të Astirit se shqyrtimi i gjestit të turpshëm të Borchardt, është një çështje që i përket menaxhimit të brendshëm dhe se në lidhje me të nuk mund të jepen detaje shtesë.
Megjithatë zyra e OSBE-së pranon në e-mail, se gjesti i ambasadorit ishte i pahijshëm. Në njoftim theksohet se incidenti me Borchardt nuk mund të zymtësojë punën e bërë nga kjo organizatë në asistimin e kryerjes së reformave të fushave të ndryshme në Shqipëri.
Për arsye të cilat nuk dihen, ambasadori Borchardt ofendoi protestuesit që bërtisnin “Rama ik!” duke u treguar gishtin e mesit ndërsa largohej. Gjest që e përsëriti dy herë.
Borchard e ka pranuar gjestin e turpshëm duke u kërkuar ndjesë banorëve të Astirit.
