Partia Demokratike ka denoncuar licensimin nga ana e qeverisë të kompanisë që menaxhonte landfillin e Sharrës, në kohën kur aty u vra Ardit Gjoklaj.
Denoncimi është bërë nga zëdhënësja e PD-së, Zhupa, e cila ka publikuar dokumentet e licensimit të kompanisë nga ana e ministrit të Mjedisit, Klosi.
Zhupa shkruan se në investigimin mediatik rezultoi se në landfillin e Sharrës shfrytëzoheshin burra, gra e fëmijë jashtë kushteve të sigurisë në punë dhe pa sigurime shoqërore dhe aty në 7 gusht 2016 u vra Ardit Gjoklaj.
Sipas Zhupës, qeveria jo vetëm që nuk ndërmori masa për shkeljet e gjetura por e ka licensuar sërish kompaninë në të njëjtën fushë veprimtarie, kësaj here për menaxhimin e mbetjeve në Elbasan.
“Licensohet përsëri nga qeveria Rama, kompania që menaxhonte landfillin e Sharrës me bekimin e Veliaj dhe ku u vra Ardit Gjoklaj dhe skllavëroheshin punëtorët e kompanisë !
Ne muajin Prill 2019 , Ministria e Mjedisit dhe Turizimit e drejtuar nga Blendi Klosi , nëpërmjet Agjencisë Kombëtare të Mjedisit kanë licensuar kompaninë Alb Tech Plast sh.p.k me pronar z. Edurim Teqja për të vazhduar në Elbasan ushtrimin e aktivitetit në fushën e mbetjeve plastike dhe llojeve të tyre.
“ Alb Tech Plast sh.p.k” është kompania “3R sh.p.k” e cila ka kryer ndryshim emri me 17 Maj 2018 dhe zotërohet nga z. Edurim Teqja, në vitin 2016 kjo kompani u kontraktua nga Veliaj, Bashkia Tiranë për kryer diferencimin e mbetjeve në Landfillin e Sharrës jashtë cdo kushti dhe parametri teknik .
Në investigimet e medias doli qartë që në Landfill shfrytezoheshin shumë persona, burra , gra dhe femijë jashtë kushteve të sigurusë në punë , pa sigurime shoqerore. Po ashtu ngjarja më e rëndë ndodhi 7 Gusht 2016 Ardit Gjoklaj u vra në ambjentet e Landfillit nga ekskavatori i kompanisë 3R sh.p.k .
Shteti jo vetëm që nuk ndërmori masa për shkeljet e evidentuara por sot e ka lincensuar përsëri në të njëjten fushë veprimatrie. Sa më shumë të abuzosh, të vrasësh, të skllavërosh njerëzit aq më të lehtë e ke të bësh biznes me rilindjen. Ky është modeli i biznesit që promovojnë, ndërsa biznesi i ndershëm po mbyllet çdo ditë.” – shkruan Zhupa.
