Me një frëngji më të mirë të mbrojtur, motor më të fuqishëm dhe një sistem shikimi që garanton saktësi të lartë gjatë natës, tanku i modernizuar T-90M tani është bërë zyrtarisht pjesë e ushtrisë ruse. Pjesa e parë e porosisë i është dorëzuar Divizionit të blinduar Taman pranë Moskës.
Ardhja në bazën e tyre të re u filmua nga kanali Zvezda i Ministrisë së Mbrojtjes dhe paraqet ushtarakë të veshur me maska mbrojtëse – një shenjë e kohës lidhur me pandeminë Covid-19.
Dallimi kryesor nga modelet e mëparshme është modelimi i ri i frëngjisë së blinduar me shumë shtresa dhe vendosja e municioneve jashtë dhomës së luftimit. Gjithashtu dizajni i ri ka një top 125 mm 2A82-1M.
