Kryetari i Partisë Demokratike Lulzim Basha është i bindur se nëse zgjedhjet do të bëheshin nesër, për shkak të kryeministrit Edi Rama, PS-ja do pësonte disfatën më të rëndë të këtyre 30 viteve.
Këtë deklaratë, Basha e bëri në një intervistë me gazetarin Enkel Demi në emisionin e mëngjesit të “ABC News”.
I pyetur për një sondazh për përparësinë elektorale të Ramës në këtë situatë të krijuar nga pandemia, Basha tha se rezultatet nuk ishin të vërteta.
“Është një nga ato raste, kur del para pasqyrës dhe i thua vetes se jam mirë, madje porosit dhe një kor që ta përsërsin këtë”– tha kreu i opozitës.
Madje ai shtoi se nuk ka asnjë shans që Rama të ketë përparësi, pasi sipas tij nëse zgjedhjet bëhen nesër Partia Socialiste do të ketë një katastrofë elektorale të paprecedentë në 30 vite.
“Kjo qeveri prej kohësh ka humbur legjitimitetin, sepse ka ardhur nga një proces i manipuluar zgjedhor Nesër, nëse do të kishte zgjedhje, do të kishte disfatën më të thellë që ka pësuar ndonjë parti politike në 30 vite në Shqipëri. E gjithë strategjia e Edi Ramës në këto vite është bazuar në shiblerjen e votës dhe nuk ka gjë më mirë që e tregon këtë sesa tërheqja me turp nga padia që bënë me tam-tame ndaj gazetës Bild, e cila ekspozoi se si ka ardhur në pushtet Edi Rama. Gjithë shqiptarët kanë dëgjuar kriminelë duke folur me politikanët për blerje të votës.
Nuk ka asnjë shans. Në qoftë se zgjedhjet bëhen nesër apo të dielën e ardhshme është e qartë se Partia Socialiste do të ketë një katastrofë elektorale të paprecedentë në 30 vite dhe të merituar do të thoja, për shkak të Edi Ramës, për shkak të mosmbajtjes së premtimeve, për shkak të kaosit dhe kolapsit ekonomik ku e ka futur vendin, edhe para pandemisë, për shkak të keqmenaxhimit të gjithçkaje, edhe të tërmetit. Por kjo nuk është tema sot. Një qeveri ka për detyrë t’i vijë në ndihmë njerëzve, detyrë në të cilën kjo qeveri ka dështuar në mënyrën më spektakolare, por këtë dështim e paguajnë qytetarët.”- tha Basha.
Kreu i PD-së foli për përkeqësimin e situatës nga pandemia për shkak të keqmenaxhimit nga qeveria. “Ka shumë fjalë, shumë pak veprim nga autoritet”– tha Basha, i cili vuri në dukje se 5 javë pas nisjes së karantinës, numri i atyre që janë në pamundësi reale ekonomike është shtuar me të paktën 20-30 përqind.
