Në 24 orët e fundit janë regjistruar 14 raste pozitive me COVID-19 në vendin tonë, duke e çuar numrin total të të infektuarve në 726.
Siç mund ta vëreni edhe në hartën e ilustruar më poshtë, rastet e reja të janë shënuar në Krujë (9), Tiranë (4) dhe Shkodër (1).
Një nga rastet e reja në kryeqytet, është një person nga burgu “313” në Tiranë, që është kthyer në një vatër të nxehtë të epidemisë. Por vatra e re kryesore e cila mbetet më problematike, vijon ajo në Krujë kur virusi ka nisur të përhapet nga puna në fasoneri.
Ministria e Shëndetësisë ka publikuar të dhëna dhe mbi numrin e të shëruarve, që aktualisht ka shkuar në 410. Lezha, Rrogozhina dhe Tropoja, janë tre qytetet e vetme ku janë shëruar të gjithë personat e konfirmuar si të infektuar nga virusi.
Mëngjesin e sotëm ka ndërruar jetë një pacient i prekur nga koronavirusi, duke shënuar kështu viktimën e 28 të kësaj pandemie në vend.
Ministria e Shëndetësisë thotë se 60-vjeçari me inicialet R.K nga Tirana, ishte i shtruar në reanimacion prej dy javësh në spitalin “Shefqet Ndroqi” në gjendje shumë të rëndë shëndetësore.
Ai vuante edhe nga disa sëmundje bashkëshoqëruese (Diabet Melitus, Kardiopatia Hipertensive, Nefropatia Diabetike, Obezitet).
