Albana Vokshi e ka quajtur kriminal vendimin e ministres së Arsimit, Shahini, për zhvillimin e zgjedhjeve në universitete në datën 30 korrik.
Sipas demokrates, Rama kërkon të emërojë në krye të institucioneve arsimore në vend të besuarit e tij ndërsa e quan antikushtetues dhe kriminal vendimin e qeverisë për zgjedhjet.
“Zgjedhjet universitare janë ngjarja me domethënëse për demokracinë e universiteteve, por qeveria e Edi Ramës synon t’i shndërrojë ato në zgjedhje moniste për të emëruar më të besuarit në krye të fakulteteve dhe universiteteve, veçanërisht në Tiranë. Këtij qëllimi kriminal i shërben edhe vendimi më i fundit i Ministrisë së Arsimit, që ka caktuar datën 30 Korrik për zgjedhjet në univeristete. Nga pikëpamja ligjore, vendimi i qeverisë “Rama” është antikushtetues. Nga pikëpamja njerëzore, është kriminal. Ai vë në rrezik shëndetin e studentëve dhe pedagogëve, të cilët i thërret në një proces zgjedhor, në një kohë kur numrat e të prekurve nga COVID dhe vatrat e infeksionit po rriten çdo ditë.” – shkruan ajo.
Më tej demokratja thotë se me vendimin e marrë për të zvilluar zgjedhjet në universitete më 30 korrik, janë përjashtuar nga e drejta për të votuar 75% e studentëve ndërsa pedagogët nuk kanë asnjë mundësi të shpalosin platformat e tyre duke qenë se universitetet në vend janë mbyllur.
“Edi Rama kërkon të bëjë me universitete atë që bëri me zgjedhjet e 30 Qershorit, të emërojë njerëzit e tij, duke eliminuar çdo mundësi për garë të ndershme. Me vendimin antikushtetues dhe të paligjshëm të Ministres së Arsimit, qeveria ka përjashtuar 75 përqind të studentëve nga e drejta për të votuar. Ai lejon të kthehen në auditorë vetëm një pjesë të studentëve, ata që largohen këtë vit akademik, si në bachelor edhe në master, duke përjashtuar dhe duke i hequr të drejtën e votës, të gjithë pjesës tjetër të stundetëve. Ministrja e Arsimit nuk lë asnjë mundësi për shpalljen e platformave të dekanëve apo rektorëve, nuk lë asnjë mundësi për fushatë me studentët dhe pedagogët, pasi fakultetet janë të mbyllur, studentët janë të larguar për shkak të pandemisë. Kjo situatë e krijuar me vetëdije nga Edi Rama dhe Besa Shahini për të kapur dhe kontrolluar edhe universitetet, si çdo qelizë tjetër të këtij shteti, është e papranueshme! Është një përpjekje për të rrënuar edhe atë pak që ka mbetur nga autonomia në arsimin e lartë. Është shuarje e çdo shprese që kishin një vit më parë studentët në protestën e tyre. Këto zgjedhje pa votues, pa studentë, me shantazhe dhe presione duhet të anullohen! Zgjedhjet në universitete duhet të kryhen në ligjshmëri të plotë, ku të respektohet e drejta kushtetuese për të zgjedhur dhe për t’u zgjedhur. Procesi duhet shtyrë dhe të rihapet nga e para për të garantuar standarde, konkurencë dhe garë të lirë e të ndershme.” – shton ajo.
Në fund Vokshi shkruan se me anë të vendimit antikushtetues e kriminal, Rama kërkon të emërojë në krye të Universitetit të Tiranës si rektor, Artan Hoxhën, një ish-gjyqtar me pasuri të pajustifikuar prej 200 mijë dollarësh, shkruan Vokshi.
“Vendimi antikushtetues i qeverisë së Edi Ramës për të bërë zgjedhjet në universitete më 30 Korrik i shërben vetëm emërimit pa garë në krye të rektoratit të një shërbëtori të pushtetit, si Artan Hoxha, dekanit famëkeq të Fakultetit Juridik. Përveçse njihet si ish gjyqtari me pasuri të pajustifikuar 200 mijë dollarë, Artan Hoxha, mbahet mend si dekani që futi pabesisht policinë në mjediset e universitetit për të rrahur studentët në kulmin e grevës së tyre. Atë që nuk bëri dot Emiljano Shullazi 4 vjet më parë, nuk mund ta bëjë sot me një vendim antikushtetues Besa Shahini dhe Edi Rama.” – mbyll reagimin e saj Vokshi.
