Zv.drejtoresha e Policisë së Shtetit, Aida Hajnaj, është përzgjedhur nga komisioni përgjegjës si emri që do i përcillet Këshillit të Lartë të Prokurorisë si drejtuese për Byronë Kombëtare të Hetimit.
Në njoftimin zyrtar bëhet me dije se pas shqyrtimit të kritereve u vendos përzgjedhja e emrit të Aida Hajnaj (Veizaj) si drejtuese e BKH-së për një periudhë 5-vjeçare.
Përzgjedhja e Hajnajt si drejtuese e BKH-së ishte paralajmëruar nga Partia Demokratike, që kërkoi përjashtimin e saj nga gara për shkak të aferave të pretenduara.
“Komisioni i Përzgjedhjes së Drejtorit të BKH-së ka përfunduar procesin e identifikimit të kandidatit më të mirë për pozicionin e Drejtorit të Byrosë Kombëtare të Hetimit, në përputhje me dispozitat e Ligjit nr.95/2016, për ‘Organizimin dhe funksionimin e Institucioneve për të luftuar Korrupsionin dhe Krimin e Organiziuar’ (SPAK).
Komisioni i Përzgjedhjes zhvilloi dy mbledhje në datat 24.07.2020 dhe 27.07.2020, në prani dhe të Komisionit të Pavarur të Rishikimit, i përbërë nga dy përfaqësues të Bashkimit Europian dhe dy përfaqësues të Qeverisë së Shteteve të Bashkuara të Amerikës në Shqipëri.
Komisioni pasi shqyrtoi dokumentacion e katër kandidatëve që kishin ngelur ne garë, konkretisht. Z.Artur Beu, z.Ervin Hodaj, z.Idajet Faskaj dhe znj.Aida Veizaj, në raport me kriteret e parashikuara në nenin 34 të ligjit nr.95/2026, që duhet të plotësojë Drejtori i Byrosë Kombëtare të Hetimit, pasi administroi dhe ‘Opinionin këshillues të Komisionit të Pavarur të Rishikimit’, bazuar në përcaktimet e neni 33/2 të ligjit nr.95/2016, vendosi që t’i rekomandojë Këshillit të Lartë të Prokurorisë, emërimin e znj.Aida Veizaj, në pozicionin Drejtorit të Byrosë Kombëtare të Hetimit, për një mandat pesëvjeçar.
Në ditët në vijim do të njoftojmë datën kur Drejtori do të fillojë detyrën dhe kur do të nisë procesi i rekrutimit të hetuesve të BKH-së.” – thuhet në njoftim.
