Zyrtarët e sigurimit kombëtar të SHBA-ve kanë raportuar se Irani ishte përgjegjës për dërgimin e mesazheve kërcënuese me e-mail te votuesit demokratë.
Email-et duket se vinin nga një grup i ekstremit të djathtë dhe kishin për qëllim të “nxisnin trazira”, tha Drejtori i Inteligjencës Kombëtare, John Ratcliffe.
Ratcliffe tha gjithashtu se zyrtarët amerikanë zbuluan se Irani dhe Rusia kanë marrë “disa informacione për regjistrimin e votuesve”.
Ky njoftim vjen 13 ditë para zgjedhjeve presidenciale.
Informacioni i pazakontë i inteligjencës afër votimit shihet si një dëshmi e shqetësimeve të qeverisë për ndërhyrjet e votimit dhe fushatat e dezinformimit nga aktorët e huaj.
Ratcliffe tha se “postat elektronike të Iranit” pretendojnë të dërgohen nga “Proud Boys” në mënyrë që të “frikësojnë votuesit, të nxisin trazira dhe të dëmtojnë” presidentin Donald Trump.
Ai shtoi se të dhënat e votuesve mund të përdoren në përpjekjet për të “komunikuar informacione të rreme për votuesit e regjistruar që ata shpresojnë se do të mbjellin kaos konfuzioni dhe do të minojnë besimin tuaj në demokracinë amerikane”.
Ratcliffe tha se zyrtarët “nuk kanë parë të njëjtat veprime nga Rusia”, por janë të vetëdijshëm se ata kanë disa informacione për votuesit, shkruan BBC.
Në shumë shtete, të dhënat e votuesve janë në dispozicion sipas kërkesës, megjithëse secili shtet ka kërkesa të ndryshme se kush mund të kërkojë informacionin e votuesit, cilat të dhëna janë në dispozicion dhe si mund të përdoren këto të dhëna.
“Nëse merrni një email frikësues ose manipulues në email-in tuaj, mos u shqetësoni dhe mos e përhapni atë”– tha Ratcliffe, duke i quajtur veprimet për të ndikuar votuesit amerikanë “përpjekje të dëshpëruara nga kundërshtarë të dëshpëruar”.
Nga ky njoftim është e paqartë se si Irani dhe Rusia e morën informacionin – dhe saktësisht çfarë informacioni kanë ata.
