Policia në Fier ka vënë në pranga një person, lidhur me vrasjen e 50-vjeçarit Ahmet Toska.
Ngjarja e rëndë ka ndodhur mëngjesin e 26 tetorit, kur Toska u vra me armë zjarri teksa përcillte gruan e tij për në furrën e bukës ku ajo punonte.
Punonjësi i karburantit, njihej nga fqinjët si njeri i qetë dhe pa probleme.
Lidhur me ngjarjen, është vënë në pranga 52-vjeçari me inicialet F.H.
Njoftimi i Policisë:
Nga Sektori për Hetimin e Krimeve të Rënda në DVP Fier, në bashkëpunim me Prokurorinë e Rrethit Gjyqësor Fier, në lidhje me ngjarjen e ndodhur në datë 26.10.2020, ku në lagjen “Sheq i madh”, Fier është vrarë me armë zjarri shtetasi A. T., 50 vjeç, pas një pune të mirëorganizuar dhe hetimeve të pandërprera, është arritur të behet kapja dhe ndalimi i autorit të dyshuar:
F.H., 52 vjeç, banues në Fier.
Prokuroria pranë Gjykatës së Shkallës së Parë Fier në bazë të fakteve dhe provave të administruara në interes të hetimeve të procedimit penal të regjistruar për vrasjen e shtetasit A. T., ka lëshuar urdhërin për ndalimin e shtetasit F. H., si autor i dyshuar për kryerjen e veprës penale “Vrasje me paramendim” dhe “Mbajtje pa leje të armëve dhe municionit luftarak”.
Materialet i kaluan Prokurorisë pranë Gjykatës së Shkallës së Parë Fier, për veprime të mëtejshme procedurale.
