Kryeministri Edi Rama dhe ministrja e Arsimit, Evis Kushi janë në një konferencë me gazetarët.
Kryeministri foli për mundësinë e mbylljes së shkollave, duke thënë se kjo nuk është përgjegjësi e tij por e autoriteteve që kanë ekspertizën e duhur.
Ai po ashtu ka deklaruar se për momentin shkollat nuk konsiderohen një vatër e nxehtë. Ndërsa ka folur edhe për mbrojtjen psikologjike të fëmijëve, që e konsideron si një domosdoshmëri.
“Duke qenë se jemi sot për arsimin dhe kam ndjekur me vëmendje që ka së paku për sa kam mundur unë të konstatoj nga çfarë lexoj në faqen time dhe në rrjetet e mia sociale një zë të përsëritur për mbylljen e shkollave. Dua të theksoj dhe njëherë se çfarë hapet dhe çfarë mbyllet është përgjegjësi e autoriteteve tona të autorizuara që kanë të gjithë ekspertizën dhe autoritetin ligjor që të marrin vendime në këto kohë të vështira.
Sipas të gjitha të dhënave dhe ndjekur të gjitha orientimet e autoriteteve shkencore, shëndetësore në të gjithë vendet që ne i ndjekim me shumë vëmendje për të mësuar sa më shumë shkollat nuk konsiderohen një vatër e nxehtë por një hapësirë që si të gjitha hapësirat e tjera kanë patjetër dhe potencialin e tyre të rrezikut.
Nga njëra anë është shumë e rëndësishme që masat të zbatohen nga çdo shkollë, siç po ndodh, që personeli drejtues dhe pedagogjik të jetë sa më i durueshëm dhe këmbëngulës në zbatimin e tyre dhe nga ana tjetër ajo çka kam dëgjuar nga ekspertët tanë është që në vlerësimet e përgjithshme që bëhen lidhur me shkollat, domosdoshmëria për të mbajtur një ekuilibër midis këtij aspekti, mbrojtjes së drejtpërdrejt dhe mbrojtjes psikologjike të fëmijëve është në rendin e ditës të kësaj vendimmarrjeje. Është një vendimmarrje në dorë të autoriteteve tona, nuk më takon mua, nuk na takon neve”, deklaroi Rama.
