Këngëtarja Shkurte Fejza dhe vajza e saj Gresa Behluli, janë kritikuar për këngën e tyre më të fundit. Përveç komenteve negative që kanë marrë në rrjet, kundër këngës së re me titullin “Nuse, mësuse” ka dalë edhe organizata “Qendra Kosovare për studime gjinore”.
Kjo organizatë thotë se kënga humoristike përmban gjuhë të urrejtjes dhe promovon nënshtrimin e grave. Ndaj i fton të gjithë që t’i bëjnë “report” këngës së publikuar në kanalin në “Youtube”.
“Ditë më parë është publikuar një këngë nga Shkurte Fejza dhe Gresa Behluli me titull ‘Nuse mësuese’, këngë e cila përveç që i redukton gratë në rolet tradicionale gjinore, është shumëfish shtypëse për gratë duke qenë se promovon dhunën ndaj grave si mjet të disiplinimit të tyre përmes përmbajtjes frazave si: ‘Fjala prishë e fjala ndreqë, Zgjedhi nuse ma mire fjalët, Në daç punët mos me i pasë keq, Zgjedhi nuse fjalët me mjaltë’ apo ‘Me folë butë e me duru, Nana ty nuse t’ka mësu, Vjehrren me e respektu, Ti nderon prindërit e tu’.
Këngë të tilla i kontribuojnë gjithashtu vazhdimësisë së thellimit të pabarazisë gjinore dhe përjetimit të grave si dytësore dhe lehtë të dominueshme.
Andaj, ju ftojmë që të klikoni në vegzën e videos dhe ta raportoni duke klikuar butonin “Report” dhe duke e zgjedhur opsionin ‘Hateful or abusive content’.”- reagon organizata.
Sipas disa komentuesve në rrjet, kjo këngë i kthen gratë shqiptare “200 vite mbrapa”.
Por ashtu sikurse ka patur kritika, kjo këngë ka gjetur edhe mbështetje tek disa të tjerë.
Anëtarja e LDK-së, Melihate Tërmkolli u ka dalë në krah dy këngëtareve, duke thënë se Shkurte Fejza është një “institucion kulturor” që i ka dhënë fuqi “frymës kombëtare”.
“Me këngën e shumëpërfolur, Shkurte Fejza, nuk do t’i bëjë gratë as më të dobëta as më të fuqishme. Nëse nuk iu pëlqen kënga, vetëm mos e dëgjoni. Nuk është se mua më pëlqen ky tip kënge, në asnjë mënyrë, por po deshët të hyni në ‘kontrolle’ të këngëve siç po bëni tani me këngën e Shkurte Fejzës, me motivin se ato promovojnë pabarazi gjinore ose të tilla që prekin edhe në vlera tjera, bëjeni pa hipokrizinë tipike, sidomos të llafazaneve të barazisë gjinore. Të tilla ka me qindra këngë. Ju propozoj të filloni me këngën shumë të preferuar për shqiptarët ‘dy të dashura që i kam’.”- vazhdon më tej Tërmkolli.
Kënga me tekstin e shkruar nga një burrë, Ilir Berani, është publikuar më 27 nëntor, por vetëm javën e fundit ka marrë vëmendje në rrjet pas kritikave që mori pikërisht lidhur me tekstin.
Teksti i plotë:
Ah moj nuse sikur msuse
N’shpi t’burrit mban ligjërata
S’po t’pëlqejnë ty punt e vjehrrës
S’po t’pëlqejnë çka thonë kunatat
Mori nuse vezulluse
Ma e reja je n’ket shpi
Dikush tjetër ma i vjetër
Pun’t ma mirë se ti i di
Ref…x2
Fjala prish e fjala ndreq
Zgjidhi nuse ma mirë fjalt
N’daq pun’t mos me i pas keq
Zgjidhi nuse fjalt me mjaltë
Ah moj nuse lumja nuse
Bijat për ty e shqyen defin
Me gëzim të madh ty të kanë pritur
Prandaj ti mos jau prish qejfin
Me fol but e me dëgju
Nana ty nuse t’ka mësu
Vjehrrën me e respektu
Ti nderon prindërit e tu
Ref…x2
Fjala prish e fjala ndreq
Zgjidhi nuse ma mirë fjalt
N’daç punt mos me i pas keq
Zgjidhi nuse fjalt me mjaltë
Ref…x2
Fjala prish e fjala ndreq
Zgjidhi nuse ma mir fjalt
N’daç punët mos me i pas keq
Zgjidhi nuse fjalt me mjaltë
