Disa adoleshentë kanë grabitur laboratorin e informatikës në shkollën e mesme të Kukësit.
Policia thotë se tre të mitur kanë shkatërruar dyert e shkollës dhe janë futur në laboratorin e Informatikës ku kanë vjedhur 5 kompjutera dhe disa aksesorë të tjerë.
Ata janë identifikuar por nuk janë vënë në pranga për shkak të moshës së mitur dhe po procedohen në gjendje të lirë.
Të dhënat e Policisë
Zbardhet dhe dokumentohet vjedhja me thyerje në laboratorin e informatikës së shkollës së mesme të qytetit të Kukësit.
Sekuestrohen 5 kompjuterët e vjedhur.
Procedohen në gjendje të lirë 3 shtetas të mitur, si autorë të dyshuar.
Efektivët e Komisariatit të Policisë Kukës, pas marrjes së informacionit se në shkollën e mesme të qytetit të Kukësit, persona të paidentifikuar kishin shkatërruar dyert e shkollës dhe më pas ishin futur në laboratorin e informatikës, ku kanë vjedhur 5 kompjuterë dhe aksesorët e tyre, kanë vlerësuar situatën dhe menjëherë është ngritur grupi hetimor, me qëllim identifikimin dhe vënien para përgjegjësisë ligjore të autorëve.
Si rezultat i hetimeve profesionale të kryera u bë i mundur identifikimi i autorëve të vjedhjes, që janë shtetasit e mitur E. E., E. E. dhe K. E., të cilët për shkak të moshës u proceduan në gjendje të lirë.
Në cilësinë e provës materiale u sekuestruan 5 kompjuterët dhe aksesorët e tjerë të vjedhur në ambientet e shkollës.
Materialet i kaluan Prokurorisë pranë Gjykatës së Shkallës së Parë Kukës, për veprat penale “Vjedhja” e kryer në bashkëpunim dhe “Shkatërrimi i pronës”.
