Duke folur për miratimin e marrëveshjes me Pfizer/BioNTech për vaksinën anti-covid, Kryeministri Edi Rama nga foltorja e Kuvendit deklaroi se mundësia është që të porositen edhe sasi të tjera shkallë-shkallë.
Edhe nga Kuvendi Rama nuk la pa thumbuar BE-në duke thënë se në planifikimin e aksesit në vaksinën Pfizer, unioni nuk pa përtej kufijve të vetvetes.
“Për fat të keq në konceptin e planifikimit të marrjes së aksesit në vaksinim përmes Pfizer, BE nuk pa përtej kufijve të vetvetes dhe faktikisht e la fatin e vaksinimit të rajonit të Ballkanit në atë që u quajt mundësi për marrëveshje bilaterale. Përjashto Serbinë dhe Shqipërinë asnjë nuk ka filluar vaksinimin. Të gjitha vendet e rajonit prej kohësh kanë parapaguar për të pasur akses përmes COVAX, një platformë për të gjithë por që ende nuk është hapur. Ende nuk ka filluar furnizimi përmes COVAX.
Ne e kemi ndeshur në vet të parë vështirësinë. Ka një element që duhet pasur parasysh që vendet për të bërë marrëveshje me njëra-tjetrën, qoftë për të dhuruar, shitur apo shkëmbyer duhet patjetër që të marrin leje nga Pfizer. Ndryshe ky transaksion është i pamundur. Kështu shkruhet edhe në marrëveshjen që ne sapo kemi konkluduar. Sipas marrëveshjes në parim do të vijë brenda janarit dhe pastaj shkallë shkallë mund të porosisim sasi të tjera edhe drejtpërdrejt nga Pfizer, meqë e kemi dakorduar edhe në marrëveshje. Ky është një proces që ka të papriturat e veta“-deklaroi Rama.
