Ministri në detyrë i Shëndetësisë në Kosovë, Armend Zemaj ka njoftuar se janë regjistruar edhe 246 persona të infektuar me koronavirusin e ri. Shifra bazohet në testimet e 3.031 mostrave.
Të dielën, sipas Zemajt, nuk është regjistruar asnjë rast i vdekjeve nga koronavirusi i ri.
Më vonë të dielën, Instituti Kombëtar i Shëndetësisë Publike njoftoi se gjatë 24 orëve të fundit, janë shëruar 201 pacientë derisa numri i përgjithshëm i të shëruarve deri më sot (14 shkurt) është gjithsej 55.761, kurse numri i rasteve aktive është 7.036.
Rastet e para me koronavirus, Kosova i regjistroi më 13 mars, 2020. Që atëherë, Kosova ka shënuar 64.341 raste të të infektuarve. Prej tyre, 1.544 pacientë kanë vdekur.
