Kryeministri Edi Rama ka publikuar sot foton e një infermiereje e cila punon në Spitalin Infektiv në Tiranë, e cila është shtatzënë.
Përmes historisë së infermieres Xhorxhina Metushi, kryeministri Rama shpreh mirënjohjen për mjekët e infermierët që vijojnë luftën me koronavirusin në frontin e parë të betejës.
“Në armatën e bluzave të bardha, që bëjnë dallimin e madh në këtë kohë lufte për shëndetin, është edhe një brez i ri profesionistësh si Xhorxhina Metushi.
Prej ditës së parë të përballjes me Armikun e Padukshëm, infermierja e palodhur e Spitalit Covid 1, vijon të qëndrojë në vijën e parë të zjarrit, teksa pret të sjellë në jetë fëmijën e saj, duke marrë në sy rrezikun për të shpëtuar njerëz në rrezik për jetën!
Krenar për bluzat e bardha që në ditët më të mundimshme të vendit, dëshmojnë me forcën e shembullit të tyre, se jo vetëm nuk janë të gjithë njësoj po edhe se një dorë abuzuesish e batakçinjsh mes bluzave të bardha, nuk e zhbëjnë dot moralin njerëzor e dinjitetin profesional të shumicës dërrmuese të tyre. Heronj!”- shkruan Rama krahas fotos.
