Gjiganti rus i energjisë Gazprom tha se eksportoi 7 milionë ton gaz natyror të lëngshëm (LNG) në vitin 2020 dhe po planifikon të dyfishojë shitjet vjetore deri në vitin 2025, tha Pavel Sedov, kreu i eksporteve në Gazprom Export.
Sedov shtoi se Gazprom është ende një ndërmarrje mjaft e vogël e gazit të lëngshëm, por portofoli i kompanisë po rritet. Gazprom Export përqendrohet në tregjet në rritje të gazit natyror, përfshirë gazin e lëngshëm në Azi.
Kompania thuhet se po planifikon të sigurojë rritjen e furnizimeve të gazit me anë të objektit të saj të eksportit në Ust-Luga në Rusinë veriperëndimore, që është aktualisht në ndërtim e sipër.
Gazprom është një aksioner në Sakhalin Energy, operatori i projektit të naftës dhe gazit Sakhalin-2, i cili është i angazhuar në zhvillimin e fushave Piltun-Astokhskoye dhe Lunskoye në verilindje të shelfit Sakhalin. Infrastruktura e projektit përfshin një impiant të gazit të lëngshëm.
Ndërmarrja është pjesërisht në pronësi të Shell, e cila mban 27.5 përqind, Mitsui, me 12.5 përqind dhe Mitsubishi Corporation, zotërimet e së cilës janë gjithsej 10 përqind. Në vitin 2020, Sakhalin Energy prodhoi mbi 11.6 milion ton gaz, më e shumta ndonjëherë për projektin.
