Senati amerikan miratoi të shtunën planin e Presidentit Joe Biden prej 1.9 trilionë dollarësh për ndihmën për koronavirusin, pas një seance që zgjati që nga nata e kaluar.
Plani përfundimtar përfshin 400 miliardë dollarë në formë pagesash prej 1,400 dollarësh për shumicën e amerikanëve, nga 300 dollarë në javë për 9,5 milion njerëz që kanë humbur punën dhe 350 miliard dollarë ndihma për shtetet dhe qeveritë lokale që kanë mbetur me mangësi në buxhetet e tyre për shkak të pandemisë.
Presidenti Joe Biden tha të shtunën se miratimi nga Senati i projektligjit nënkupton se pagesat 1,400 dollarëshe për shumicën e familjeve amerikane do të fillojnë këtë muaj dhe dispozitat e projekt-ligjit do të përshpejtojnë prodhimin dhe shpërndarjen e vaksinave.
Zoti Biden, duke komentuar në Shtëpinë e Bardhë, tha se pagesa do të marrin mbi 85% e familjeve amerikane; një çifti me dy fëmijë që kanë deri në 100,000 dollarë të ardhura në vit i takon të marrë rreth 5,600 dollarë.
Senati e miratoi projektligjin me 50 vota pro dhe 49 kundër, në linja thjesht partiake. Një senator republikan nuk ishte i pranishëm. Asnjë republikan nuk votoi pro për këtë paketë stimuluese, ndër më të mëdhatë në historinë e vendit.
Beteja ende nuk ka mbaruar, pasi projektligji duhet të kthehet të martën në Dhomën e Përfaqësuesve, e cila miratoi një version pak më të ndryshëm një javë më parë. Projektligji duhet të kalojë nëpër një proces rakordimi mes Dhomës dhe Senatit.
Paketa stimuluese është një përparësi për Presidentin Biden ndërkohë që vendi vazhdon betejën me pandeminë, e cila ka shkaktuar vdekjen e më shumë se 520,000 amerikanëve.
