Danimarka është bërë vendi i radhës që ka ndaluar përdorimin e vaksinës anti-Covid të kompanisë Oxford/AstraZeneca. Më herët këtë gjë e ka bërë Austria ndërsa Franca e Gjermania po hasin vështirësi për të bindur qytetarët që të bëjnë vaksinën në fjalë.
Në vendet e lartpërmendura, vaksina ka shfaqur efekte anësore të padëshiruara dhe po hetohen lidhjet mes saj e përkeqësimit të shëndetit të dhjetëra personave. Danimarka thotë se ka ndaluar përdorimin e vaksinës COVID-19 të AstraZeneca ndërsa hetuesit po shikojnë disa raste të mpiksjes së gjakut midis njerëzve të vaksinuar.
Vendi ka ndaluar përdorimin e tij të vaksinës së koronavirusit për të paktën 14 ditë në përgjigje të rasteve, tha të enjten autoriteti shëndetësor danez. Një nga këto raste kishte të bënte me vdekjen e një personi në Danimarkë, tha ministri i Shëndetësisë, Magnus Heunicke. Megjithatë ai shtoi se nuk ishte e qartë nëse mpiksjet e gjakut ishin të lidhura me vaksinën.
Në një deklaratë, ministria daneze e shëndetësisë tha se kishte prova të mira se vaksina, e zhvilluar nga AstraZeneca dhe Universiteti i Oksfordit, ishte e sigurt dhe efektive.
Njerëzit që morën dozën e tyre të parë të vaksinës AstraZeneca do të duhet të presin për dozën e tyre të dytë gjatë pezullimit, tha autoriteti shëndetësor. Ai shtoi se ishte duke pritur për rezultatet e një hetimi nga Agjencia Evropiane e Barnave.
