Ambasadorja e SHBA-ve në Tiranë, Yuri Kim në një intervistë për Abc News komentoi përzgjedhjen e partive të kandidatëve për deputetë duke theksuar se ka vënë re një përmirësim të listave.
Kim tha prokurorët duhet të bëjnë punën e tyre me emrat dhe pastërtia është e lidhur me punën e KQZ-së.
“Mendoj që ka emra për t’u shqetësuar. Por në përgjithësi më lejoni të them këtë gjë. Mendoj që pjesa më e madhe e partive kanë bërë përmirësim në cilësinë e listave të tyre. Disa nga emrat e dukshëm nuk janë përfshirë në to.
Por në të njëjtën kohë është edhe e qartë që mund të kishin bërë më mirë. Dhe sikundërse e them: tashmë është një proces që është i lidhur me punën e KQZ-së, Prokurorët duhet të bëjnë punën e tyre. Por në fund të ditës janë votuesit shqiptarë të cilët duhet ta marrin vendimin se kush do t’i përfaqësojë ata. Se kush ja vlen që të ulet në Kuvend” tha ajo.
Kim vlerësoi kërkesën e PD-së drejtuar KQZ për largimin nga lista të Tom Doshit dhe kërkoi të njëjtën gjë, edhe nga PS.
“Ju më bëtë pyetje mbi personin të cilit i është bërë përcaktimi. Dua të them që është një gjë shumë e mirë që Partia Demokratike ka qenë e qartë në dënimin e këtij personi duke kërkuar që ky person të largohet nga lista e kandidatëve për deputetë.
Dëshiroj të shoh që edhe Partia Socialiste apo të tjerët të jenë po kaq të qartë. Kam krijuar pak konfuzion por mendoj që është koha e duhur për të qartësuar çdo konfuzion dhe për të qenë absolutisht të qartë se ku qëndrojmë të gjithë” theksoi Kim.
