Policia në Divjakë ka proceduar penalisht 20 persona pas një incidenti të shënuar mbrëmjen e kaluar në fshatin Shën e Premte.
Mes të proceduarve janë edhe dy kandidatët për deputetë të Partisë Demokratike të qarkut Fier, Enkelejd Alibeaj dhe Saimir Korreshi. 18 personat e tjerë janë mbështetës të tyre.
Personat në fjalë ishin mbledhur mbrëmë rreth orës 22:35 poshtë banesës së kryetares së PS-së në fshatin Shën e Premte pasi dyshonin se ajo shpërndante para për të blerë votat, dhe pasi policia kishte shkuar në vendngjarje për të parë se çfarë po ndodhte, kanë thënë se kanë dalë në mbrojtje të votës së lirë.
Bëhet fjalë për incidentin e denoncuar më herët nga zv.kryeministri Erion Braçe, i cili thoshte se kryetarja e PS-së në këtë fshat, ishte “terrorizuar nga banda e Alibeajt”.
Njoftimi i Policisë
Nga Specialistët për Hetimin e Krimeve në Komisariatin e Policisë Divjakë, filloi procedimi penal për shtetasit:
E. A., S. K., I. Dh., E. V., A. M., S. S., L. Z., H. D., L. Zh., F. M., A. M., A. B., A. K., A. P., A. K., L. Rr., A. K., D. S., A. Sh., F. Sh.
Në datë 24.04.2021, në orën 22:35, në Sallën Operative ka telefonuar një qytetare e cila thot se në fshatin Shën e Premte, Divjakë, përreth banesës së saj ka grumbullim personash dhe automjetesh.
Pas telefonatës, në vendngjarje kanë shkuar shërbimet e Policisë dhe konstatuan se përreth banesës së shtetases K. G ishin grumbulluar disa mbështetës të një subjekti politik, të cilët pasi u pyetën nga policia, pretendonin se ishin për mbrojtjen e votës së lirë.
Për këta shtetas u morë masa administrative për shkelje të aktit normativ dhe i’u kërkua që të shkonin në banesat e tyre.
Në këto momente në vendngjarje kanë mbërritur edhe drejtues politikë të kësaj partie me disa simpatizanë të tjerë të cilët edhe pas thirrjeve që ju bëri Policia për t’u larguar, bllokuan rrugën.
Në vijim të veprimeve të kryera në koordinim me Prokurorinë pranë Gjykatës së Shkallës së Parë Lushnjë dhe me Specialistët për Hetimin e Krimeve në DVP Fier, u proceduan në gjëndje të lirë 20 shtetas për veprat penale “Organizime dhe pjesëmarrje në grumbullime e manifestime të paligjshme”, dhe “Mosbindja ndaj urdhërit të punonjësit të policisë së rendit publik”.
