Vihet në pranga një 51-vjeçar në Gjirokastër, i cili nuk donte të lejonte punonjësit e policisë t’i kontrollonin banesën dhe i kërcënoi ata me granatë në dorë.
Punonjësit e Policisë kishin shkuar në banesën e 51-vjeçarit me inicialet A.I, pas informacioneve që ai dispononte armë zjarri në banesë.
Kur ata shkruan për kontroll, i dyshuari bëri rezistencë dhe nuk i lejoi punonjësit e policisë të futeshin brenda për të kontrolluar.
Ai ka marrë një granatë difensive me vete dhe ka tentuar të largohet duke kërcënuar punonjësit e Policisë që të mos e ndiqnin, pasi do t’i qëllonte.
Por pas një rrethimi që i bënë zonës, 51-vjeçari arriti të ndalohej dhe të vihej në pranga. Ai rezulton me precedent të mëparshëm penal, pasi ka qenë i dënuar më parë për vrasje dhe kontrabandë.
NJOFTIMI I POLICISË
Kërcënoi me granatë në dorë, punonjësit e Policisë, me qëllim moslejimin e kontrollit të banesës dhe më pas tentoi të largohej, por falë ndërhyrjes profesionale, shërbimet e Policisë gjatë ndjekjes neutralizuan dhe prangosën 51-vjeçarin.
51-vjeçari i dënuar më parë për vrasje dhe kontrabandë.
Gjatë kontrollit në banesë, shërbimet e Policisë i kanë gjetur dhe një armë zjarri kallashnikov me një krehër me fishekë luftarakë.
Në vijim të punës për parandalimin, evidentimin dhe goditjen e paligjshmërisë, specialistët e krimeve në Komisariatin e Policisë Gjirokastër, në bashkëpunim me Forcat “Shqiponja”, në bazë të informacioneve të marra në rrugë policore se një shtetas, në lagjen “11 Janari”, Gjirokastër, dispononte armë zjarri në banesë, kanë organizuar punën për të ushtruar kontroll në banesën e shtetasit të dyshuar.
Në momentin që shërbimet e Policisë janë afruar pranë banesës së tij, shtetasi A. I. ka marrë një granatë difensive me vete dhe ka tentuar të largohet duke kërcënuar punonjësit e Policisë që të mos e ndiqnin, pasi do t’i qëllonte.
Shërbimet e Policisë, nisur nga rrezikshmëria që paraqiste ky person, kanë rrethuar zonën në një perimetër të gjerë dhe falë veprimeve dhe ndërhyrjes profesionale kanë bërë të mundur neutralizimin dhe prangosjen e këtij shtetasi, i cili mbante me vete një granatë difensive të montuar me ndezës universal.
Gjithashtu, si rezultat i kontrollit të banesës, Policia gjeti dhe sekuestroi në cilësinë e provës materiale 1 armë zjarri automatik, një krehër dhe 19 fishekë.
Materialet procedurale i kaluan Prokurorisë pranë Gjykatës së Shkallës së Parë Gjirokastër, për veprime të mëtejshme.
