Ishte ai që përdori telekomandën që shpërtheu pajisjen që shkaktoi masakrën e Capaci-t. Ishte gjithashtu ai që urdhëroi mbytjen dhe shpërbërjen me acit të të voglit Giuseppe Di Matteo. Sot, pas 25 vitesh, Giovanni Brusca, është liruar nga burgu pasi ka përfunduar dënimin e tij.
Giovanni Brusca njihet si një nga personat më besnik të Toto Rinos, kreut të bandës famëkeqe të “Cosa Nostra”-s dhe akuzohet për qindra vrasje, por ndër ato që bëri më shumë bujë, ishte atentati ndaj ish-gjyqtarit të njohur Giovani Falcone dhe bashkëshortes së tij Francesca Morvillo.
Lirimi i tij ka sjellë shqetësime në jetën politike dhe medietike të Italisë, por motra e Giovanni Falcone-s, Maria bën thirrje për qetësi.
“Nga ana njerëzore, kjo më dhemb, por ky është ligji, një ligj që sidoqoftë e ka vlerësuar vëllai im dhe prandaj duhet të respektohet. Unë vetëm shpresoj që gjyqësori dhe policia të jenë vigjilentë me vëmendje ekstreme në mënyrë që të shmangin përsëri rrezikun e kryerjes së një krimi, duke qenë se po flasim për një person i cili ka pasur një rrugë bashkëpunimi me drejtësinë shumë të mundimshme”. – thotë ajo, citojnë mediet italiane.
Maria Falcone pastaj shtoi se “i njëjti gjyqësor në disa raste ka shprehur dyshime në lidhje me tërësinë e zbulimeve të Bruscës, veçanërisht ato në lidhje me trashëgiminë e cila, me gjasë, nuk është konfiskuar e gjitha. Nuk është më koha për gjysmë të vërteta dhe do të ishte një fyerje për Giovanni-n, Francesca-ën, Vito-n, Antonio-n dhe Roço-n që një njeri që ka kryer krime të tmerrshme mund të kthehet i lirë për të shijuar pasuri të njomura me gjak “.
Reagimet e familjeve të viktimave të masakrës së Capacit ishin akoma më të ashpra.
Tina Montinaro, e veja e Antonio Montinaro, i cili ka qenë përgjegjësi i Giovanni Falcone, dëgjoi lajmin dhe tha se ishte e indinjuar nga kjo: “Unë jam vërtet e indinjuar. Shteti po vepron kundër nesh. Ne ende nuk e dimë të vërtetën për masakrat pas 29 vitesh dhe Giovanni Brusca, njeriu që shkatërroi familjen time, është i lirë. A e dini se cila është e vërteta? Le të vijë ky shtet përballë nesh. Çfarë do t’i them nipit tim tani? Se njeriu që vrau gjyshin e tij vrapon lirshëm? “.
Giorgia Meloni nga ana tjetër, tha se kjo është “një disfatë për të gjithë, një turp për të gjithë Italinë”.
Brusca ishte arrestuar në vitin 1996, e më pas shprehu pendesën, duke bashkëpunuar me policinë.
