Goditen dy raste të kalimit klandestin të emigrantëve, kundrejt parave. Policia e Gjirokastrës, ka njoftuar se ka arrestuar dy persona, të cilët janë kapur me mjetet e tyre duke transportuar 14 emigrantë të paligjshëm
Njëri rast u ndalua në fshatin Bulo të Gjirokastrës, ku shtetasi me inicialet H. M., 30 vjeç nga Lazarati, i cili, po transportonte me mjetin e tij “Opel Corsa”, 11 emigrantë të paligjshëm. Ai besohet se u kishte marrë atyre nga 200 euro.
Sakaq, nga krahu tjetër, në pranga ka rënë edhe shtetasi H.M, 33-vjeç, pasi po transportonte tre emigrantë drejt Tiranës.
Ndërsa 33-vjeçari me inicialet A. H., u ndalua në afërsi të Kakavijës, ku kishte 3 emigrantë të paligjshëm nga vendet e treta, të cilët po i conte në Tiranë kundrejt fitimit 200 euro për person.
Njoftimi i Policisë:
Goditen dy raste të tjera të tentativës për dhënie ndihmë për kalim të paligjshëm të kufirit, kundrejt fitimit.
Si rezultat i shkëmbimit të informacionit, bashkëpunimit dhe koordinimit të veprimeve mes Policisë Kufitare të Kakavijës, FRONTEX-it dhe DVP Gjirokastër, vihen në pranga 2 persona që u kapën duke transportuar emigrantë të paligjshëm, kundrejt fitimit.
Sekuestrohen dy automjete dhe dy aparate celular.
Nga Seksioni për Hetimin e Trafiqeve në DVP Gjirokastër, në bashkëpunim me shërbimet e Policisë Kufitare Kakavijë dhe shërbimet e FRONTEX-it, pas informacioneve të siguruara në rrugë operative u arrestua në flagrancë shtetasi H. M., 30 vjeç, banues në fshatin Lazarat, Gjirokastër.
Shtetasi H. M. u kap në afërsi të fshatit Bulo, duke transportuar me automjetin tip “Opel Corsa”, 11 emigrantë të paligjshëm nga vendet e treta, në drejtim të Tiranës, kundrejt fitimit 200 euro për person.
Gjithashtu u arrestua në flagrancë shtetasi A. H., 33 vjeç, banues në Sarandë, i cili u kap në afërsi të fshatit Kakavijë, duke transportuar me mjetin tip “Benz”, 3 emigrantë të paligjshëm nga vendet e treta, në drejtim të Tiranës, kundrejt fitimit 200 euro për person.
Në cilësinë e provës materiale u sekuestruan dy automjete dhe dy aparate celular.
Materialet në ngarkim të shtetasve të mësipërm i kaluan Prokurorisë pranë Gjykatës së Shkallës së Parë Gjirokastër, për veprime të mëtejshme, për veprën penale “Ndihma për kalim të paligjshëm të kufijve”.
