Një vajzë e re, që u shfaq duke kërcyer në mes të rrugës në Tiranë bashkë me dy shoqet e saj, është proceduar penalisht ndërsa mjeti që po përdorte është bllokuar.
Videoja u shfaq në rrjetet sociale e në të tregohen tre vajza të reja që zbresin nga makina në zonën e Astirit dhe nisin të kërcejnë duke bllokuar qarkullimin e mjeteve.
Sipas Policisë Rrugore, 21-vjeçarja me iniciale V.D., banuese në Tiranë nuk kishte leje drejtimi dhe përveç prodecimit penal e sekuestrimit të mjetit, është ndëshkuar edhe me 50 mijë lekë të reja gjobë.
Njoftimi
“Nisur nga publikimi në media sociale, i një videoje ku shfaqej një shtetase, e cila nga verifikimi rezultoi se më datë 22.08.2021, kishte ndaluar automjetin në karrexhatë, në rrugën “Teodor Keko” dhe së bashku me pasagjeret që udhëtonin me të, kryente veprime të ndaluara në rrugë, duke krijuar një gjendje të rrezikshme dhe bllokim të trafikut, efektivët e Komisariatit Rajonal të Policisë Rrugore Tiranë, pasi identifikuan zonën dhe të dhënat e automjetit, bënë të mundur konstatimin dhe shoqërimin e automjetit, si dhe procedimin penal të drejtueses, shtetases V. D., 21 vjeçe, banuese në Tiranë, për drejtim mjeti në mënyrë të parregullt, pasi rezultoi e papajisur me leje drejtimi. Gjithashtu, kjo shtetase u ndëshkua me masë administrative 50.000 lekë të rinj, për veprime të ndaluara në rrugë, ndërsa mjeti u sekuestrua në cilësinë e provës materiale. Ndërkohë po punohet për identifikimin dhe procedimin e personit përgjegjës që i ka besuar mjetin shtetases së papajisur me leje drejtimi.”
*Video Credit: JOQ
