Sali Berisha ndryshoi 360 gradë mendimin për Lulzim Bashën, që prej largimit që ky i fundit i bëri nga grupi parlamentar i PD-së 3 ditë më parë.
Lëvdatat dhe deklaratat me superlativa për Bashën u harruan nga një veprim i vetëm dhe nisën akuzat kundrejt ish-ministrit më të suksesshëm sipas tij gjatë dy mandateve që qeverisi.
Mjafton të sjellim në vëmendje një fjalim të Berishës në mandatin e parë të Ramës ku në parlament e quante Bashës si ministri promotor i rrugësë së Kombit, promotor i hyrjes në NATO apo edhe ministri që realizoi heqjen e vizave.
Madje sipas Berishës ato që bëri Basha si ministër Rama nuk i bënte as sikur të kishte tre jetë.
“Edhe merret me Lul Bashën! Çfarë ka bërë ai thotë! Mësoje çfarë ka bërë: Ka qenë ministër i Punëve Publike. Ishte promotor jetik për Rrugën e Kombit. Mësoje! Ishte ministër i Jashtëm. Ishte promotor kryesor i anëtarësimit të Shqipërisë në NATO. Ishte ministër i Punëve të Brendshme. Realizoi vizat për shqiptarët, në një kohë kur ti nuk ke shitur as tre tablo të tuat, në një kohë kur ti ke betonuar Tiranën. Edhe tre jetë të kesh nuk i bën dot ti ato që bën Lulzim Basha. Nuk matesh kurrë me të, hiqe nga mendja! Edhe në fund të fundit të ka palosur ty në 2011-ën”-deklaronte Berisha.
