Në vitin 2020 menaxhimi i mbetjeve urbane u përkeqësua, pasi u rrit më tej përqindja e popullatës që nuk e mori këtë shërbim, raportoi INSTAT.
Sipas të dhënave zyrtare në vitin 2020 rezulton të jenë menaxhuar rreth 1,04 milionë tonë mbetje urbane, duke shënuar një rënie me rreth 3,5 %, krahasuar me vitin 2019.
Sasia vjetore e mbetjeve urbane të menaxhuara për banorë, në shkallë vendi, në vitin 2020 është 369 kg/banor, nga 381 kg/banor që ishte në vitin paraardhës.
Në vitin 2020, sasia e mbetjeve jo urbane të menaxhuara bashkë me ato urbane është 17,2 % ndaj sasisë gjithsej, nga 13,0 % që ka qenë në 2019, duke shënuar një rritje me 4,2 %.
Niveli i mbulimit të popullatës me shërbime komunitare për menaxhimin e mbetjeve urbane është 86,9 %, duke shënuar një rënie me 1,0 %, krahasuar me vitin paraardhës.
Në përbërjen e mbetjeve urbane komponent kryesor janë mbetjet organike. Në vitin 2020, mbetjet organike përbëjnë rreth 58,5 % të sasisë gjithsej të mbetjeve, kundrejt 58,4 % që ky tregues ishte në vitin 2019.
Në vitin 2020 u depozituan rreth 80,2 % e sasisë gjithsej të mbetjeve në landfille dhe fusha mbetjesh, duke shënuar një rritje me 2,2 %, krahasuar me të njëjtin indikator një vit më parë.
Në vitin 2020 u ricikluan 18,1 % e sasisë gjithsej të mbetjeve, ndërkohë që në vitin e kaluar ky tregues ishte 18,7 %. Në vitin 2020 janë hedhur jashtë landfillt 0,5 % e sasisë totale të mbetjeve, duke shënuar kështu një rënie të këtij treguesi me 1,8 %, krahasuar me të njëjtin tregues në vitin 2019.
Në vitin 2020, janë gjeneruar gjithsej rreth 1,17 milionë tonë mbetje urbane, ndërkohë në vitin 2019 kjo shifër ishte rreth 1,20 milionë tonë.
Mbetjet të pa menaxhuara në raport me sasinë totale të mbetjeve të gjeneruara në vitin 2020 janë 1,1 % më shumë se në vitin 2019.
Deri në vitin 2018 statistikat mbi “Mbetjet e Ngurta Urbane në Shqipëri” mbështeteshin në të dhëna të mbledhura në terren nëpërmjet anketës vjetore mbi mbetjet urbane pranë subjekteve që ushtronin veprimtarinë e mbledhjes dhe menaxhimit të tyre. Në vitin 2020, INSTAT për mbledhjen e të dhënave mbi mbetjet e ngurta urbane referuar vitit 2019, ka aplikuar për herë të parë metodën inovative nëpërmjet pyetësorëve elektronikë “online” pranë gjithë bashkive të vendit. Mbetjet e ngurta urbane depozitohen në kazanët e grumbullimit të mbetjeve dhe në vendin tonë, ato mblidhen përgjithësisht të pandara sipas llojit dhe në shumë raste në po të njëjtin vend hidhen edhe mbetje industriale qe rezultojnë nga prodhime dhe shërbime të subjekteve të vogla biznesi në territorin urban.
VINI RE: Ky artikull është pronë intelektuale e Monitor.al
