Senati italian votoi të mërkurën për të bllokuar debatin mbi një projekt-ligj që do ta bënte dhunën ndaj grave dhe personave LGBT+ një krim urrejtjeje, duke hedhur poshtë kështu propozimin e miratuar më parë nga dhoma e ulët e parlamentit.
Projektligji, i përkrahur nga Partia Demokratike (PD) e qendrës së majtë, ka shkaktuar diskutime të ashpra në Itali, ku përfshihet edhe Vatikani që pretendon se ky projektligj se mund të kufizojë lirinë fetare të Kishës Katolike.
Senati votoi me 154 vota, 131 kundër e 2 abstenim, për bllokimin e mëtejshëm të debatit mbi projektligjin pasi partitë e qendrës së djathtë thanë se teksti do të frenonte opinionet kundërshtuese për çështjet LGBT+, duke përfshirë ata që pretendojnë se një familje kërkon vetëm bashkimin e një burri dhe një gruaje.
Parlamenti nuk do të jetë në gjendje të rihapë diskutimet mbi ligjin e propozuar për gjashtë muajt e ardhshëm dhe ligjvënësit e qendrës së majtë besojnë se do të jetë e pamundur ta miratojnë atë përpara se kjo legjislaturë të përfundojë në fillim të vitit 2023.
“Projektligji ka vdekur”- tha senatori i PD-së Dario Parrini për Reuters.
Grupet e avokimit të LGBT+ thonë se homofobia është një problem serioz në Itali dhe janë ankuar prej kohësh se sulmet homofobike dhe transfobike gjykohen me akuza më të vogla se sulmet raciste.
Grupi më i madh i të drejtave LGBT+ në Itali, Arcigay, regjistron më shumë se 100 raste të krimit të urrejtjes dhe diskriminimit çdo vit, por përpjekjet e shumta gjatë 25 viteve të fundit për të krijuar një ligj për të ndëshkuar aktet e homofobisë dhe transfobisë kanë dështuar.
Në Itali, ku sindikatat e të njëjtit seks u miratuan në vitin 2016, miratimi i ligjeve për të drejtat civile shpesh është shënuar nga kundërshtime të forta nga grupet katolike dhe konservatore.
Mbështetësi dhe nismëtari i projektligjit, deputeti homoseksual i PD-së, Alessandro Zan, ka mohuar vazhdimisht se ky projektligj do të cenonte lirinë e fjalës sikurse pretendojnë konservatorët, duke thënë se ai do të ndëshkonte vetëm krimet e urrejtjes.
Vatikani kishte frikë se ligji mund të çonte në kriminalizimin e Kishës në Itali për shkak të refuzimit për të celebruar martesat homoseksuale, për kundërshtimin e birësimit nga çiftet homoseksuale ose refuzimin për të mësuar teorinë gjinore në shkollat katolike.
Pse njerëzit ishin kundër projektligjit?
Kritikët e projektligjit thanë se ai rrezikonte lirinë e shprehjes dhe mund të çonte në propagandë të homoseksualëve në shkolla.
Vatikani paraqiti një ankesë të rrallë zyrtare diplomatike kundër ligjit të propozuar në qershor, duke pretenduar se ai shkelte Konkordatin, traktatin dypalësh midis Italisë dhe Selisë së Shenjtë. Ai tha se ligji mund të çojë në ndjekjen penale të katolikëve për shprehjen e mendimeve në favor të strukturave tradicionale të familjes heteroseksuale.
Udhëheqësi i Ligës, Matteo Salvini tha se përkrahësit e projektligjit nuk kishin mundur të arrinin mbështetjen e kritikëve për shkak të papërkulshmërisë së tyre në përmbajtjen e ligjit.
“Ata u thanë jo të gjitha propozimeve të kompromisit, përfshirë ato të propozuara nga Ati i Shenjtë (Papa Françesku), nga shoqatat dhe nga shumë familje.”- tha Salvini.
Parlamenti është i bllokuar nga rihapja e diskutimeve mbi ligjin e propozuar për gjashtë muajt e ardhshëm, duke e bërë pothuajse të pamundur miratimin e tij përpara se legjislatura të përfundojë në fillim të vitit 2023.
MOMENTI kur u votua për rrëzimin e projektligjit:
