Drejtoria e Përgjithshme e Shërbimit të Transportit Rrugor (DPSHTRR) ka publikuar bilancin mbi numrin e aksidenteve në 10-muajt e fundit, ndërsa bëhet krahasimi me të njëjtën periudhë të vitit 2018 dhe 2019.
DPSHTRR njofton se numri i viktimave në aksidente rrugore me pasoja fatale ka rënë ndjeshëm në 22 muajt e fundit, edhe pse kemi 110 mijë mjete më shumë në këtë periudhë. Po ashtu, në këto 22 muaj rreth 120 mijë persona kanë marrë leje drejtimi për herë të parë.
NJOFTIMI I DPSHTRR
10-mujori 2021 dhe krahasimi me po atë periudhë të 2018, 2019-ës (viti 2020 ka qenë me qarkullim të kufizuar nga masat anti-Covid19) për aksidentet rrugore me pasoja, fatalitetet, moshat e përfshira, kategoritë e përdoruesve të rrugës dhe disa nga shkaktarët kryesorë.
Edhe pse kemi rreth +110,000 mjete rrugore më shumë, të regjistruara gjatë 2020-ës dhe 2021-shit (në 12+10 muaj) si edhe +120,000 drejtues mjeti më shumë që kanë marrë lejedrejtimi për herë të parë në këto 22 muaj, kemi ulje të numrit të aksidenteve rrugore me pasoja dhe ulje të fataliteteve!
Shifra mjaft pozitive tregojnë ulje të aksidenteve me pasoja nga drejtuesat e mjetit të moshës deri 24 vjeç dhe shumë më pak aksidente nga drejtues mjeti të moshave 25 deri 34 vjeç! Kemi ulje të ndjeshme të aksidenteve nga moshat e reja, ulje edhe nga moshat 35 deri 60 vjeç! Rritja e vetëdijes, kujdesi i shtuar nga të sapopatentuarit, mjete më të sigurta nga një kontroll teknik më cilësor, edukimi më profesional nga Autoshkollat dhe testimet më të përgjegjshme nga Komisionet e DPSHTRR, kanë dhënë rezultat!
Ndikim ka patur edhe puna më e mirë e Policisë Rrugore me masat e kontrollet e shtuara ndaj kundravajtësve!
Statistikat sinjalizojnë rritje fatalitetesh nga pakujdesia e këmbësorëve në kalimin e karexhatave, tregues që kërkon punë me ndërgjegjësimin, infrastrukturën e sinjalistikën rrugore, edukimin dhe kujdesin me këtë kategori vulnerabël!
