Një organizatë jofitimprurëse në hije e njohur si ‘Qendra e Pjesëmarrjes së Votuesit’ thuhet se shpenzoi mbi 100 milionë dollarë përpara zgjedhjeve presidenciale të vitit 2020 për të tërhequr qindra mijëra vota nga ata që konsiderohen si votues të mundshëm të Joe Biden.
Grupi me bazë në Uashington mblodhi 85 milionë dollarë dhe shpenzoi një shumë edhe më të madhe duke shpërndarë miliona posta dhe njoftime dixhitale për votuesit gjatë vitit 2020, raportoi ‘The Hill’ këtë javë. Megjithëse Qendra e Pjesëmarrjes së Votuesit (VPC) nuk bën fushatë në mënyrë të hapur për kandidatë të caktuar, ajo synon votuesit më të rinj, pakicat dhe gratë e pamartuara, të cilat të gjitha tradicionalisht favorizojnë demokratët, por zakonisht sjellin pjesëmarrje nën mesataren.
Drejtori ekzekutiv i grupit, Tom Lopach, tha për ‘The Hill’ se kishte dërguar rreth 371 milionë posta gjatë ciklit zgjedhor të 2020-ës, duke u kërkuar votuesve të regjistroheshin për votimin me postë ose të votonin herët. Ata gjithashtu me sa duket dërguan 300 milionë mesazhe të tjera dixhitale përmes reklamave dhe e-maileve.
Lopach vlerësoi se grupi kishte sjellë rreth 272,000 vota nga njerëz që normalisht nuk do paraqiteshin në qendrat e votimit, duke ndihmuar potencialisht Biden të siguronte fitoret e tij të ngushta në shtetet e luhatshme si Arizona, Wisconsin dhe Georgia.
Meqenëse grupi është një organizatë jofitimprurëse e regjistruar, ai është i përjashtuar nga zbulimi i burimeve të fondeve të tij dhe Lopach nuk dha hollësi. Megjithatë, ai tha se grupi kishte ‘mbështetje të fortë nga fondacionet’ dhe ‘organizatat që besojnë në pjesëmarrjen e votuesve dhe individët privatë’.
Duke e përshkruar VPC-në si një ‘plejadë e organizatave të parave të errëta’, ‘The Hill’ raportoi se qindra miliona dollarë ‘para të errëta’ u përdorën në zgjedhjet e vitit 2020, për të mbështetur Biden e për të sulmuar Trump. Grupi vëzhgues ‘OpenSecrets’, i cili gjurmon paratë e errëta në politikë, ka nxjerrë në pah mbi 30 milionë dollarë në financime të tilla të shpenzuara gjatë zgjedhjeve. Kjo shifër nuk përfshin fondet nga VPC dhe grupe të tjera që nuk janë paraqitur në raport.
