Qeveria e Kosovës ka ofruar 20 mijë euro shpërblim për secilin qytetar që jep informacione që çojnë në zbulimin e autorit apo autorët e vrasjes së trefishtë në Gllogjan të Deçanit.
Këtë të Dielë qeveria e Kosovës ka njoftuar shpërblimin me 20 mijë euro për atë person që jep informacione për sjelljen e të dyshuarve para drejtësisë.
“Lidhur me rastin e vrasjes së trefishtë të premten mbrëma në Gllogjan, Policia e Kosovës me të gjitha njësitet e saj relevante është angazhuar në hetimin dhe ndriçimin sa më parë të këtij rasti.
Policia është duke punuar në mbledhjen dhe analizimin e të gjitha fakteve dhe dëshmive relevante për të zbardhur sa më parë këtë rast dhe për të sjellë para drejtësisë sa më parë që të jetë e mundur kryerësin/it e kësaj vepre kriminale.
Megjithatë, për identifikimin sa më të shpejtë të kryerësit/ësve të këtij akti kriminal, Qeveria, Ministria e Punëve të Brendshme dhe Policia kërkojnë ndihmën e qytetarëve dhe kujtdo që mund të ketë informacione të rëndësishme për zbardhjen e rastit.
Si Kryeministër, bashkë me Ministrinë e Punëve të Brendshme dhe Policinë e Kosovës apelojmë te qytetarët që mund të kenë ndonjë njohuri rreth rastit ta ndihmojnë policinë me informacione për gjetjen e autorit/ve të këtij akti dhe për këtë ofrojmë një shpërblim prej 20.000 euro (njëzet mijë euro), për cilindo qytetar i cili mund të jep informacione të cilat shpiejnë në zbardhjen ose zbulimin e këtij rasti.
Qytetarët të cilët kanë informacione lidhur me këtë rast mund t’i dërgojnë ato në këto numra telefoni dhe e-mail adresën e poshtëshënuar: Tel:-080019999 ose -192, dhe e-mail: info@kosovopolice.com
Thirrjet në këta numra të telefonit janë pa pagesë për të gjithë qytetarët dhe policia do ta ruajë strikt të drejtën e anonimitetit apo fshehtësisë së identitetit, përveçse nëse personat vetë, pra vullnetarisht, deklarohen ndryshe.”- thuhet në njoftimin e Qeverisë së Kosovës.
Ngjarja e rëndë ka ndodhur dy ditë më parë, kur një autobus me nxënës shkolle që po shkonin nga Gjakova për në Deçan është sulmuar me armë zjarri nga një i dyshuar i panjohur.
Nga kjo ngjarje humbën jetën dy prej nxënësve si dhe shoferi i autobusit, ndërsa mbeti i plagosur edhe një person tjetër.
