Mijëra njerëz marshuan të dielën nëpër rrugët e kryeqytetit të Belgjikës, Bruksel, duke protestuar kundër kufizimeve të reja Covid-19. Një grup demonstruesish u përleshën me policinë, e cila u përgjigj me gaz lotsjellës dhe ujë.
Rreth 8,000 njerëz morën pjesë në protestat në rrugë në Bruksel të dielën, sipas vlerësimeve të policisë. Pjesëmarrësit dënuan politikat e qeverisë për Covid-19, duke përfshirë vaksinimin dhe pasaportën e vaksinimit, për të cilën ata pretendojnë se shkel të drejtat dhe liritë e njeriut.
Marshuesit u shoqëruan nga një forcë e madhe policie dhe protesta u zhvillua kryesisht në mënyrë paqësore dhe u raportua vetëm për hedhje sporadike të sendeve ndaj oficerëve. Protestuesit u panë duke mbajtur pankarta të ndryshme, ku shkruhej ‘Covid është një gjenocid i organizuar’, ‘Të bashkuar për lirinë, të drejtat dhe fëmijët tanë’ dhe të ngjashme.
Ndërsa shumica e marshuesve në dukje u shpërndanë vetë pas përfundimit të ngjarjes, një grup më i vogël protestuesish të zhurmshëm u përplasën me një barrikadë të rëndë policie që ruante perimetrin e lagjes së BE-së në Bruksel, ku strehohet Komisioni Evropian dhe ndërtesa të tjera zyrtare.
