Deputetja e Partisë Demokratike, Jorida Tabaku ka reaguar pas vendimit të Gjykatës së Tiranës e cila i dha të drejtë Erion Veliajt se nuk ka shpifur ndaj saj se ka përfituar nga denoncimet publike për shembjen e shkollës Sami Frashëri.
Tabaku thotë se drejtësia e re dhështoi të japë drejtësi për atë që ka pushtet edhe pse sipas saj kishte dorëzuar në prokurori dhe Gjykatë provat që provonin se është abuzuar me prishjen e shkollës Sami Frashëri.
“Ashtu si dhe dje, drejtësia e re dështoi të japë drejtësi kur bëhet fjalë për atë që ka pushtet!
Muajt e fundit kam depozituar në gjykatë një padi penale për kryetarin e Bashkisë, Erjon Veliaj.
Ky I fundit më ka akuzuar për përfitime të paligjshme në kohën kur unë bëja denoncime për mënyrën si u shemb shkolla e mesme Sami Frashëri!
Ndonëse në gjykatë kam siguruar kontratën e plotë të shtëpisë të blerë dy vite përpara ndërtimit dhe procedurave të shembjes me shumë pikëpyetje të shkollës dhe tenderit të rindërtimit të saj.
Megjithëse kam siguruar për gjykatën dhe prokurorin të dhënat e kredisë bankare të marrë në këtë periudhë, duke paraqitur të gjitha provat dhe faktet në lidhje me këtë çështje.
Apo që kam dëshmuar me prova të patjetërsueshme se kompania nga ku është blerë prona ime nuk ka asnjë lidhje me kompaninë që ka përfituar me ndonjë nga kanë fituar një tender abuziv me pikëpyetje të rindërtimit të shkollës Sami Frashëri”-shkruan Tabaku.
Deputetja e PD-së thotë se Veliaj paraqiti zero prova ndërsa gjyqtari vendosi drejtësi me justifikimin “politikani duhet të durojë më shumë përdersa është në politikë”.
Sipas saj drejtësia dështoi të përcaktoijë ndarjen mes lirisë së fjalës dhe shpifjes.
“Edhe pse mbrojtja e avokatëve të Veliaj përkufizohej në zero fakte dhe prova përpos justifikimit “e tha se kështu thonë mediat” përsëri gjyqtari dështoi të vendosë drejtësinë me justifikimin se “politikani duhet të durojë më shumë përderisa është në politikë”.
Pra, kjo Gjykatë SPAK vlerësoi se shpifja është pjesë e një lufte politike dhe se duhet të durohet më shumë nga politika edhe kur faktet mungojnë.
Duke dështuar të vendosë drejtësinë në vend dhe të përcaktojë qartë ndarjen e lirisë së fjalës me shpifjen.
Unë e kuptoj se Veliaj ka sistemin e tij të drejtësisë brenda drejtësisë. E kam të qartë se ai ka punuar që të jetë mbi ligjin dhe se ka të emëruar aty brenda”-thekson deputetja e PD.
Tabaku përfundon se nuk do ndalojë së thëni të vërtetën dhe nuk do pengohet të apelojë vendimin në të gjithë shkallët e gjyqësorit.
Ajo shton se inceneratori i Tiranës mund të jetë gijotinë dhe se e vërteta do daëlë në pah.
“Por kjo nuk më pengon asnjë moment që unë të them me zë të lartë dhe të fortë të vërtetën. Madje nuk më pengon as për ta apeluar këtë padi dhe për ta vazhduar në të gjitha shkallët e gjyqësorit e për t’i treguar shqiptarëve që e vërteta triumfon!
Unë në moralin dhe gjykimin tim personal nuk mund të përdor shpifjen si luftë politike dhe argument politik. E refuzoj këtë sjellje të pandershme ndaj elektoratit dhe mbi të gjitha ndaj tjetrit.
Siguroj Veliaj, surrogatët e tij dhe oligarkët që e mbështesin se ky vendim nuk do më ndalojë nga denoncimi për to, aferat e tyre dhe korrupsionin e tyre.
I kujtoj Erion Veliaj që inceneratori i Tiranës mund të jetë edhe gijotina politike për të. Dhe se asnjë gjë nuk do na pengojë për të risjellë në jetë hetimin për krimin e tij me vrasjen e 17 vjeçarit Ardit Gjoklaj, për të ai do të përgjigjet herët apo vonë.
Dhe vërteta mund të vonojë por kurrë nuk do të harrojë të dalë përpara qytetarëve!”-shkruan Tabaku.
