Sekretari i Përgjithshëm i NATO-s, Jens Stoltenberg ka zbuluar se ka një tjetër pozicion që ai dëshiron të marrë, pasi emri i tij figuronte në listën e kandidatëve për postin e guvernatorit të Bankës Qendrore Norvegjeze.
Sekretari i Përgjithshëm i bllokut ka konfirmuar se ai po konkurron për postin e kreut të ardhshëm të Bankës Qendrore të Norvegjisë.
“Ministria e Financave më kontaktoi në nëntor dhe më pyeti nëse do e konsideroja të aplikoja për këtë pozicion. E kam bërë këtë tani dhe kjo është një punë për të cilën jam shumë i motivuar”, tha ai për agjencinë norvegjeze të lajmeve NTB.
Emri i tij u shfaq në listën e 22 kandidatëve të publikuar nga Ministria norvegjeze e Financave. Kandidatë të tjerë përfshijnë disa të pazakontë, si disa studentë të moshës nga 18 deri në 20 vjeç, si dhe një punonjës dyqani, një bukëpjekës dhe disa pensionistë.
Kjo nuk do të thotë se do të ishte e lehtë për shefin e NATO-s të rrëmbejë pozicionin. Ida Ëolden Bache, zëvendësguvernatorja e bankës qendrore, e konsideruar nga disa ekonomistë si pretendentja kryesore, është gjithashtu në listë.
Stoltenberg ka shërbyer më parë si Ministër i Financave i Norvegjisë dhe gjithashtu drejtoi qeverinë e vendit dy herë midis 2000 dhe 2001, si dhe midis 2005 dhe 2013, përpara se të merrte pozicionin e Sekretarit të Përgjithshëm të NATO-s në 2014.
