Prokurorët në Ukrainë kanë kërkuar nga një gjykatë lokale arrestimin e ish-presidentit Petro Poroshenko, i cili dyshohet për tradhti të lartë, raportojnë mediat në Kiev.
Kreu i partisë më popullore opozitare në vend, sipas sondazheve, pretendon se çështja ndaj tij është një mashtrim. Më parë këtë vit, një tjetër lider i opozitës, Viktor Medvedchuk, u vu në arrest shtëpiak për akuza të ngjashme.
Poroshenko, i cili shërbeu si president midis 2014 dhe 2019, dyshohet se ka kryer tradhti të lartë duke organizuar dërgesa të paligjshme të qymyrit nga rajonet separatiste në Ukrainën lindore, qeveritë e të cilave u përcaktuan si grupe terroriste nga Kievi.
Poroshenko aktualisht ndodhet jashtë vendit, por ka treguar se ka në plan të kthehet në Ukrainë. Ai i ka hedhur poshtë akuzat ndaj tij si ‘çmenduri’.
“Unë jam presidenti i pestë i vendit dhe ju duhet të paraqisni prova bindëse për shoqërinë dhe partnerët tanë të huaj përpara se të shpallni ndonjë gjë.”, tha Poroshenko për mediat ukrainase.
Partia politike e Poroshenkos, Solidariteti Evropian, lëshoi një deklaratë në tetor, duke thënë se ndjekja penale është e motivuar politikisht dhe e fabrikuar nën urdhrat e presidentit Volodymyr Zelensky, i cili mundi Poroshenkon në zgjedhjet presidenciale të 2019-ës.
