Neuralink, firma amerikane e neuroteknologjisë e bashkëthemeluar nga sipërmarrësi miliarder Elon Musk, ka filluar të rekrutojë punonjës për të kryer provat e saj klinike, duke sinjalizuar se është më afër fillimit të testimit te njerëzit të implanteve të saj të trurit.
Kompania ka postuar shpallje për të punësuar një drejtor të provës klinike dhe një koordinator të provës klinike. Reklamat theksojnë se stafi do të ‘punojë ngushtë me disa nga mjekët dhe inxhinierët më inovativë, si dhe do të punojnë me pjesëmarrësit e parë të provës klinike të Neuralink’.
Neuralink tha se drejtori do të drejtojë dhe ndihmojë në ndërtimin e ekipit të tij të kërkimit klinik dhe do të zhvillojë ‘ndërveprime rregullatore që vijnë me një mjedis me ritme të shpejta dhe gjithnjë në zhvillim’.
Musk, i cili renditet si personi më i pasur në botë me një pasuri të vlerësuar në 256 miliardë dollarë, tha muajin e kaluar se ai pret të implantojë te njerëzit çipat e trurit Neuralink diku në vitin 2022, në pritje të miratimit për planet e testimit nga Administrata Amerikane e Ushqimit dhe Barnave (FDA).
Musk dhe partnerët e tij Neuralink themeluan kompaninë në vitin 2016 për të zhvilluar çipa truri që lidhin njerëzit me kompjuterët. Ai ka pohuar se implantet do t’u mundësojnë njerëzve të paralizuar të kontrollojnë pajisje të tilla si smartfonët me trurin e tyre.
Musk pret që të bëhet më shumë përparim, duke përfshirë zgjidhje për shumë paaftësi fizike duke urëzuar sinjalet midis neuroneve, sapo të fillojë testimi njerëzor.
Neuralink tashmë ka testuar çipat e tij në trurin e një majmuni makak dhe një derri. Kompania habiti jo pak prillin e kaluar, kur postoi pamjet që pretendonin se tregonin një majmun duke luajtur një lojë video me mendjen e tij.
Subjektet e para të testimit njerëzor do të jenë njerëzit me lëndime të rënda të shtyllës kurrizore, siç janë tetraplegjikët, tha Musk muajin e kaluar në samitin e Këshillit të CEO të Wall Street Journal.
“Ne kemi një shans me Neuralink për të rivendosur funksionalitetin e gjithë trupit tek dikush që ka një dëmtim të shtyllës kurrizore.” – tha ai.
