Një ortek u ka marrë jetën katër personave të premten në rajonin e Tirolit në Austri, ndërsa një i pestë është zhdukur.
Ngjarja ka ndodhur në zonën kufitare me Zvicrën.
“Ishte një nga 13 ortekët sot në Tirol… Ndodhi jashtë pistes”- tha për AFP Patrick Ortler nga shërbimet e shpëtimit të provincës.
“Fatkeqësisht katër humbën jetën.”- tha ai, duke shtuar se një i plagosur ishte dërguar në spital, ndërsa ekipet e shpëtimit po kërkonin personin e zhdukur
Ortler ka treguar se një tjetër ortek goditi një shpat në vendpushimin e famshëm të skive të Soelden, duke varrosur pesë persona nën dëborë të cilët u nxorrën të gjithë të gjallë nga ekipet e shpëtimit.
Vitet e fundit, mesatarisht rreth 20 njerëz janë vrarë çdo vit nga ortekët në Austri.
Dy sezonet e fundit ishin më pak vdekjeprurëse pasi pandemia e koronavirusit zvogëloi numrin e skiatorëve në përgjithësi.
