Duke akuzuar Perëndimin se ka lënë Ukrainën për t’u përballur vetëm me Moskën, presidenti Volodymyr Zelensky tha të premten se nuk kishte frikë të negocionte një fund të ‘pushtimit’ rus, por do të kishte nevojë për garanci sigurie për ta bërë këtë.
Duke folur në orët e hershme të mëngjesit nga Kievi, Zelensky tha se kishte kontaktuar me ‘partnerët’ në Perëndim për t’u thënë atyre se fati i Ukrainës ishte në rrezik.
“Unë i pyeta ata – a jeni me ne?” tha Zelensky.
“Ata u përgjigjën se janë me ne, por nuk duan të na marrin në aleancë. I kam pyetur 27 liderë të Evropës, nëse Ukraina do të jetë në NATO, i kam pyetur drejtpërdrejt – të gjithë kanë frikë dhe nuk janë përgjigjur.” – shtoi ai.
“Ne mbetëm vetëm. Kush është gati të shkojë në luftë për ne? Sinqerisht, nuk shoh askënd. Kush është gati t’i japë Ukrainës garanci për anëtarësim në NATO? Sinqerisht, të gjithë kanë frikë”, shtoi presidenti.
Rusia dërgoi trupa në Ukrainë të enjten, me presidentin Putin që deklaroi një operacion të posaçëm ushtarak për të ‘çmilitarizuar dhe denazifikuar’ vendin. Moska që atëherë i ka thënë Kievit se do të konsideronte negociatat me qeverinë Zelensky nëse ajo pranon të diskutojë statusin neutral për vendin, ndër të tjera.
Në një fjalim të premten, Zelensky tha se ishte i hapur për të folur për mundësinë e një statusi neutral për Ukrainën, por këmbënguli se vendi i tij ka nevojë për garanci nga palët e treta.
“Ne nuk kemi frikë nga Rusia, nuk kemi frikë të flasim me Rusinë, të flasim për gjithçka: garancitë e sigurisë për vendin tonë dhe një status neutral. Por ne nuk jemi në NATO tani – çfarë garancie sigurie do të kemi? Cilat vende do t’i japin atyre?” tha ai, para se të shtonte se duhet të ketë bisedime për t’i dhënë fund ofensivës ushtarake ruse.
