Qytetarët në Shqipëri dhe në gjithë Ballkanin Perëndimor, kanë shqetësime legjitime për rritjen e çmimeve, thotë Komisioni Evropian.
Deklarata vjen pas pyetjeve të dërguara nga partneri mediatik i EURACTIV, pasi kryeministri Edi Rama tha, një ditë përpara se kryediplomati i BE-së Josep Borrell të vizitonte Tiranën, se një zyrtar i Brukselit kishte thënë se protestat i shërbenin Rusisë dhe Kremlinit dhe kishte pyetur se kush i organizonte ato.
Shqiptarët kanë mbi një javë që protestojnë për rritjen e çmimeve të karburanteve, energjisë dhe ushqimeve, duke kërkuar lehtësime fiskale. Qeveria ka vendosur disa masa, por ka thënë vazhdimisht se protestat janë të turpshme dhe po forcojnë Kremlinin.
“Qytetarët në Shqipëri, si dhe në pjesën tjetër të Ballkanit Perëndimor dhe më gjerë, kanë shqetësime legjitime për rritjen e çmimeve të karburanteve dhe ushqimeve.”- tha Komisioni.
“BE kujton se respektimi i standardeve evropiane për lirinë e grumbullimit paqësor dhe për mbrojtjen dhe përfshirjen e grupeve të cenueshme, janë kërkesat kyçe të anëtarësimit që monitorohen nga afër. Të gjithë aktorët e përfshirë duhet të ushtrojnë qetësinë dhe përmbajtjen maksimale.”- shtoi Komisioni Evropian.
Komenti i fundit vjen pasi qindra persona u ndaluan nga policia, mes tyre edhe oficerë të veshur civil. Disa gazetarë u sulmuan dhe njëri kërkoi trajtim spitalor pasi u shty dhe u godit me këmbë nga oficerët.
Deklarata e Komisionit vazhdon se rritja e çmimeve është “rënduar në masë të madhe nga lufta e agresionit të nisur nga Rusia kundër Ukrainës”, dhe jo nga sanksionet e BE-së dhe përafrimi i Shqipërisë me to.
“Sanksionet e BE-së synohen me kujdes dhe synojnë ata që janë përgjegjës për politikat ose veprimet që BE dëshiron të ndikojë, duke reduktuar sa më shumë që të jetë e mundur çdo pasojë të padëshiruar”.
Komisioni vuri në dukje gjithashtu ngritjen e një komiteti të posaçëm për të trajtuar ndikimin e luftës së Rusisë kundër Ukrainës në ekonominë shqiptare dhe bordit kombëtar për administrimin e karburanteve, si dhe monitorimin e vazhdueshëm të situatës nga Autoriteti i Konkurrencës së Shqipërisë.
“BE do të vazhdojë të mbështesë partnerët e saj të Ballkanit Perëndimor në zhvillimin ekonomik gjithëpërfshirës dhe të qëndrueshëm, në veçanti duke iu përgjigjur ndikimit social dhe ekonomik të luftës, goditjeve të mundshme në të ardhmen dhe për të lejuar rimëkëmbjen ekonomike.”- përfundon deklarata.
Protestuesit i kanë bërë një sërë kërkesash Ramës dhe kanë thënë se nëse nuk plotësohen do të mblidhen të shtunën në të gjithë vendin për të vazhduar protestën.
VINI RE: Ky artikull është pronë intelektuale e Euractiv
