Presidenti i SHBA-së Joe Biden ka propozuar buxhetin më të madh ushtarak ndonjëherë, duke i kërkuar Kongresit 813.3 miliardë dollarë për vitin e ardhshëm, 31 miliardë dollarë më shumë se buxheti i miratuar për vitin 2022.
“Unë po bëj thirrje për një nga investimet më të mëdha në sigurinë tonë kombëtare në histori, me fondet e nevojshme për të siguruar që ushtria jonë të mbetet ushtria më e përgatitur, më e stërvitur dhe më e pajisur në botë.” – tha Biden.
Ndërsa buxheti i propozuar është më i larti i propozuar në historinë e SHBA-së, inflacioni do të thotë se në terma realë do të ishte një rritje prej 1.5% në vend të 4%.
Drafti i Shtëpisë së Bardhë kërkon 773 miliardë dollarë vetëm për Pentagonin, ndërsa pjesa tjetër i shkon Departamentit të Energjisë, i cili ruan arsenalin bërthamor të SHBA-së.
Biden po kërkon 682 milionë dollarë shtesë për Ukrainën, ‘për të kundërshtuar sulmin rus dhe për të përmbushur nevojat e reja në lidhje me sigurinë, energjinë, çështjet e sigurisë kibernetike, dezinformimin, stabilizimin makroekonomik dhe qëndrueshmërinë e shoqërisë civile’, thuhet në dokumentin buxhetor.
