Turqia do të miratojë transferimin e gjyqit të vrasjes së Jamal Khashoggi në Arabinë Saudite, ka zbuluar ministri i saj i Drejtësisë, Bekir Bozdag. Njoftimi vjen pavarësisht pretendimeve të bëra nga e fejuara e gazetarit të vrarë dhe disa organizata të të drejtave të njeriut se udhëheqja saudite qëndron pas vdekjes së Khashoggit dhe nuk mund të pritet që atje të mbahet një gjyq i drejtë.
Duke folur me gazetarët të premten, Bozdag tha se ministria e tij ‘do dërgojë një opinion pozitiv atje në lidhje me transferimin e çështjes”’ duke shtuar se autoritetet saudite kishin kërkuar zyrtarisht këtë masë. Ministri turk gjithashtu e bëri të qartë se nëse një gjykatë saudite liron të pandehurit, çështja mund të rifillojë në Turqi.
Njoftimi i Bozdag erdhi pasi një prokuror turk bëri thirrje të enjten që gjykimi i 26 të dyshuarve sauditë, asnjëri prej të cilëve nuk është në Turqi, të ndalet dhe të transferohet në Arabinë Saudite. Zyrtari sqaroi se urdhrat e arrestit për të pandehurit nuk mund të ekzekutoheshin dhe deklaratat e tyre nuk mund të merreshin gjithsesi, duke e lënë gjyqin në harresë.
Gjykata turke që shqyrton çështjen kërkoi mendimin e Ministrisë së Drejtësisë dhe pritet të vendosë për transferimin e gjyqit të enjten e ardhshme.
Ndërsa prokurori foli në favor të transferimit të gjyqit në Arabinë Saudite, ministri i Jashtëm i Turqisë, Mevlut Cavusoglu, i përshkroi gazetarëve gjendjen e tanishmë të marrëdhënieve midis Ankarasë dhe Riadit si në ‘vendnumëro.’. Ministri, megjithatë, vuri në dukje se ‘po ndërmerren hapa për ta ringjallur atë’.
Në shkurt, presidenti turk Rexhep Tajip Erdogan sinjalizoi se ‘dialogu pozitiv me Arabinë Saudite vazhdon’, duke shtuar se Ankaraja ‘po pret për përparim përmes hapave të prekshëm në periudhën e ardhshme’.
