Ipeshkvi i Rrëshenit, Dom Gjergj Meta e ka cilësuar nismën për legalizimin e kanabisit si “Kalë Troje” për droga më të rënda në jetën e shumë të rinjve.
Ipeshkvi e shikon të çuditshme që një popullsi “konservatore” si e jona doli pro legalizimit në pyetësorin e qeverisë.
Ai thotë më tej nuk do të besojë që një nismë e tillë të jetë dorëzim i shtetit përballë mafies së kultivimit të lëndëve narkotike.
Postimi i plotë:
LEGALIZIMI I KANABISIT SI KALË TROJE …
Për momentin po kufizohem të them se legalizimi i kanabisit (qoftë edhe për qëllime kinse mjekësore) është Kali i Trojës i drogave më të rënda në jetën e shumë të rinjve, sidomos në një vend ku ka papunësi dhe varfëri midis tyre. Ky legalizim mund të jetë gjithashtu paradhoma e shumë fenomeneve të tjera të dëmshme për shoqërinë, sikurse monopolet apo logjikat mafioze.
Personalisht më çudit fakti që një popullsi aq “konservatore” si kjo e jona qenka aq pro legalizimit të kanabisit, nëse është e vërtetë që procesi i konsultimit nga ana e qeverisë ka sjellë në këto rezultate.
Nuk do të doja të besoja se disa nga këto ide janë si dikur “…me propozim nga poshtë e vendim nga lart” (për kujtesë më 9 maj 2020 kryeministri ka thënë se ka një vit që qeveria po punon me draftin e ligjit për legalizimin e kanabisit, d.m.th. qysh më 2019). Më keq akoma nuk dua të besoj se një nismë e tillë është dorëzim i shtetit përballë mafies së kultivimit të lëndëve narkotike.
Kaq për momentin për lajmin e mundësisë së legalizimit të kanabisit që u artikulua këto dy ditë.
