Një shpërthim gjatë natës në një depo të paligjshme të përpunimit të naftës në shtetin Imo të Nigerisë ka vrarë 100 njerëz, tha të shtunën Komisioneri i Shtetit për burimet e naftës. Rafinimi i paligjshëm është një problem i vazhdueshëm në një zonë të vendit të rrënuar nga varfëria dhe papunësia.
“Shpërthimi i zjarrit ndodhi në një vend magazinimi të paligjshëm dhe preku mbi 100 njerëz të cilët u dogjën aq shumë sa nuk mund të njiheshin.” – njoftoi të shtunën Komisioneri Shtetëror për Burimet e Naftës, Goodluck Opiah, sipas ‘Daily Post’ të Nigerisë.
Komisioneri tha se pronari i rafinerisë është shpallur në kërkim nga qeveria e shtetit Imo.
Shteti Imo së bashku me shtetet fqinje të Rivers dhe Bayelsa përbëjnë deltën e lumit Niger, ku lulëzojnë rafineritë e paligjshme. Nafta u pompua për herë të parë në Bayelsa në vitin 1955 nga Shell, dhe që atëherë një grup i firmave shumëkombëshe të naftës u zhvendos për të nxjerrë arin e zi nga delta e madhe dhe moçalore.
Nafta nga rajoni përbën ndërmjet 7% dhe 10% të PBB-së së vendit, por dëmi i shkaktuar në ekosistemin e deltës ka qenë katastrofik dhe vendasit do duhet të presin dhjetëvjeçarë të tërë për përmirësimin e gjendjes. Shell, për shembull, u urdhërua të paguante kompensim vetëm në vitin 2020 për një derdhje masive të naftës në Rivers State që ndodhi në vitin 1970.
Me papunësinë dhe varfërinë endemike në rajon, vendasit shpesh marrin lëndë të parë nga tubacionet e firmave të naftës dhe e përpunojnë vetë produktin.
Ky proces, i njohur si ‘bunkering’, është i rrezikshëm dhe i lë tubacionet të rrjedhin më pas. Që nga viti i kaluar, bunkerimi i paligjshëm i kushtoi Nigerisë 200,000 fuçi naftë në ditë, me një kosto prej 4.8 miliardë dollarë në vit me naftë me çmimet e vitit 2021.
Shell pretendoi në vitin 2015 se bunkerimi i paligjshëm ishte përgjegjës për 85% të naftës të derdhur nga tubat e saj në Nigeri atë vit.
