Presidenti kinez Xi Jinping është ‘i shqetësuar’ nga reagimi i Perëndimit ndaj operacionit ushtarak të Rusisë në Ukrainë dhe po shikon ‘me kujdes se çfarë mësimesh duhet të nxjerrë e të zbatojë për një pushtim të mundshëm të Tajvanit’, spekuloi drejtori i CIA-s, William Burns në një konferencë të shtunën.
Duke folur në një takim të ‘Financial Times’ në Uashington, Burns u tha dëgjuesve se agjencia e tij ka vlerësuar se përparimi i Rusisë përmes Ukrainës Lindore dhe shkalla e përgjigjes së Perëndimit mund të ketë ndikim në planet e Pekinit për Tajvanin.
“Xi Jinping është i shqetësuar nga dëmtimi i reputacionit që mund t’i vijë Kinës nga shoqërimi me brutalitetin e agresionit të Rusisë kundër ukrainasve dhe paqartësia nga pasiguria ekonomike që është prodhuar nga lufta.” – pohoi Burns.
Shefi i spiunazhit shtoi se ai beson se Kina është befasuar nga ‘fakti që ajo që ka bërë Putin po i afron evropianët dhe amerikanët dhe po shikon ‘me kujdes se çfarë mësimesh duhet të nxjerrin për një marrje të mundshme të Tajvanit.
Ndërsa ekspertët dhe politikanët amerikanë dhe udhëheqësit në Taipei dhe në rajonin më të gjerë të Azisë Lindore kanë paralajmëruar vazhdimisht se ofensiva e Rusisë kundër Ukrainës mund të ‘joshë’ Kinën të bëjë një lëvizje ndaj Tajvanit, kjo nuk ka ndodhur. Pekini pohon se Tajvani është territori i tij, por nuk janë shfaqur shenja të një pushtimi ose sulmi të afërt ndaj ishullit.
Megjithatë, ushtria tajvaneze ka mbajtur stërvitje ushtarake muajt e fundit dhe qeveria e SHBA-së i ka bërë presion Taipeit të blejë armët amerikane të modeluara për të zmbrapsur një pushtim nga deti nga Kina.
Ndërkohë, Pekini thuhet se ka depërtuar në zonën e mbrojtjes ajrore të ishullit në shumë raste, me inkursionin më të fundit të premten që përfshin bombardues me aftësi bërthamore, tha Ministria e Mbrojtjes Kombëtare e Tajvanit.
“Unë nuk mendoj për asnjë minutë se konflikti në Ukrainë ka gërryer vendosmërinë e Xi me kalimin e kohës për të fituar kontrollin mbi Tajvanin.” – vazhdoi Burns të shtunën. Megjithatë, ai pohoi se ngjarjet në Ukrainë me siguri ‘po ndikojnë në llogaritë e tyre’.
Kina u ka bërë ballë thirrjeve perëndimore për të denoncuar dhe ndëshkuar Rusinë për luftën në Ukrainë dhe ka emëruar zgjerimin e NATO-s në Evropën Lindore pas Luftës së Ftohtë si një faktor kyç për luftën.
Pekini ka dënuar gjithashtu ato që i sheh si përpjekjet e udhëhequra nga SHBA për të ndërtuar aleanca kundër Kinës, të tilla si paktet ‘AUKUS’ (SHBA, Britani e Australi) dhe ‘Quad’ (SHBA, Australi, Indi e Japoni).
Megjithëse Burns e përshkroi ‘synimin kryesor’ të Xi si ‘parashikueshmërinë’, nuk ka gjasa që Pekini të jetë tepër i shqetësuar me ‘dëmtimin e reputacionit’ të përmendur nga shefi i spiunazhit. Kina ka sulmuar tashmë SHBA-në dhe BE-në për akuzat e tyre për shkelje të të drejtave të njeriut dhe ka akuzuar Uashingtonin për ‘krime lufte’.
Po kështu, kur u nxit nga udhëheqja e NATO-s për të dënuar Rusinë, Ministria e Jashtme e Kinës në mars tha se nuk do të dëgjonte një ‘leksion mbi drejtësinë nga abuzuesi i ligjit ndërkombëtar’.
